ބިންބި

ބިންބި

ބިންބި އަކީ ގޮވާމުގެ ބާވަތެކެވެ. މިއީ އިގިލިތަކެއް ހުންނަ ކުރާ ގަނޑެއްގައި ގަންނަ ފުއްކުދި ގޮވާމެކެވެ. މިގޮވާމުގެ ބޭރުގައި ހިލަ ތޮށްޓެއް ހުންނާނެ އެވެ. މިހަރުވީމާ ހުންނާނީ ގަދަ ރަތް ކުލައިގައި ނުވަތަ މުށިކުލައިގައެވެ. ނުވަތަ ކަޅު ރަތް ކުލައިގައެވެ. މިގޮވާމުގެ ފުށްތައް ހުންނާނީ ވަށްކޮށެވެ.

ދިވެހި ނަން : ބިންބި
އިގިރޭސި ނަން : Finger millet
ޢިލްމީ ނަން : Eleusine coracana
ބިންބީގެ ކޮންމެ 100 ގުރާމުގައި
ހަކަތަ	328 ކިލޯކެލަރީ
ކާބޯހައިޑްރޭޓް	72 ގްރާމް
ޕްރޮޓީން	7.3 ގްރާމް
ފެޓް	1.3 ގްރާމް
ފައިބަރު	11.5 ގްރާމް
ނިއެސިން	1.1 މިލިގްރާމް
ރައިބޯފްލޭވިން	0.19 މިލިގްރާމް
ތިއެމިން	0.42 މިލިގްރާމް
ސޯޑިއަމް	11 މިލިގްރާމް
ކެރޮޓީން	42 މައިކްރޯގްރާމް
ޕޮޓޭސިއަމް	408 މިލިގްރާމް
ކެލްސިއަމް	344 މިލިގްރާމް
ދަގަނޑު	3.9 މިލިގްރާމް
މެގްނީޒިއަމް	137 މިލިގްރާމް
ފޮސްފަރަސް	283 މިލިގްރާމް
ޒިންކު	2.3 މިލިގްރާމް
މެންގަނީޒް	5.49 މިލިގްރާމް
މޮލީބްޑިނިއަމް	0.102 މިލިގްރާމް
ކޮޕަރ	0.47 މިލިގްރާމް
ކްރޯމިއަމް	0.028 މިލިގްރާމް
ސަލްފަރ	160 މިލިގްރާމް
ކްލޮރިން	44 މިލިގްރާމް

ބިންބިން ލިބިދޭ ބައެއް ޞިއްޙީ ފައިދާތައް

ބަރުދަން ލުއިކުރުމަށް އެހީތެރިވުން : ބިންބި ބޭނުންކުރުމަކީ ބަރުދަން ލުއިކުރުމަށް އެހީތެރިވެދޭނެ ކަމެކެވެ. ބިންބީގައި ހިމެނޭ "ޓްރައިޕްޓަފާން" ކިޔާ އެމިނޯއެސިޑް އަކީ ކާހިތްވުން ދަށްކޮށްދޭ މާއްދާ އެކެވެ. ގޮވާމުގެ އެހެން ބާވަތްތަކާ އަޅާބަލާއިރު، ފައިބަރު ވެސް ހުންނަލެއް މަދެއް ނޫނެވެ. ބިންބި އަކީ ސަރުބީ މަދު ގޮވާމެކެވެ. ބިންބީގައި ހުންނަ "އަންސެޗިޔުރޭޓެޑް ފެޓް" އެވެ. މިހުރިހާ ކަމެއް މިހެން ހުރުމަކީ ގޮވާމުގެ ބާވަތްތަކުގެ ތެރެއިން ބަރުދަން ލުއިކުރުމަށް ބިންބި ހޮވާލެވޭނެ ސަބަބުތަކެވެ. ބިންބީގައި ފައިބަރު ހުރުމުން، ބިންބި ބޭނުންކުރުމުން ފުރިފައި ހުންނަ އިހުސާސެއް ގެނެސްދެއެވެ. މީގެ ސަބަބުން އެތައް ބައިވަރު އިތުރު ހަކަތަ ހަށިގަނޑަށް ވަނުން (ކެވޭ މިންވަރު) މަދުކޮށްދެއެވެ. ކެވޭ މިންވަރު މަދުވާނަމަ، ހަށިގަނޑުގެ ބަރުދަން ލުއިކުރުމަށް އެހީތެރިކަން ލިބޭނެ އެވެ. 

ކަށިތަކުގެ ދުޅަހެޔޮކަން ދެމެހެއްޓުން : ގަހުން ލިބިދޭ ކާނާގެ ތެރެއިން ކެލްސިއަމް އެންމެ ގިނައިން ހުންނަނީ ބިންބީގައެވެ. ކެލްސިއަމް އާއި، ވިޓަމިން ޑީ އަކީ ދުޅަހެޔޮ ކަށިތަކަކަށް ބޭނުންތެރި މާއްދާ ތަކެކެވެ. މިއީ ކުޑަކުދިންނާއި، މުސްކުޅިންނަށް، ކެލްސިއަމް ފޯރުކޮށްދެވޭނެ ރަގަޅު މަޞްދަރެކެވެ. ބިންބި އަކީ ކުޑަކުދިންގެ ކަށިތައް ހެދިބޮޑުވުމަށް އެހީތެރިވެދީ، ބޮޑެތި މީހުންގެ ކަށިތައް މަރާމާތުކޮށް ބެލެހެއްޓުމަށް ބޭނުންތެރި ކާނާގެ ބާވަތެކެވެ. އެހެންކަމުން ބިންބި ބޭނުންކުރުމަކީ ކަށީގެ މައްސަލަތަކުން ދުރުކޮށްދީ، ކަށިތައް ބިނދުމާއި، ރެނދުލުން ފަދަ މައްސަލަތަކުން މިންޖުކޮށްދޭނެ ކާނާގެ ބާވަތެކެވެ. 

ހަކުރު ބަލިން ރައްކާތެރިކޮށްދިނުން : ގަވާއިދުން ބިންބި ބޭނުންކުރުމަކީ ހަކުރު ބަލިޖެހުމުގެ ފުރުޞަތު ކުޑަކޮށްދޭނެ ކަމެކެވެ. މިގޮތަށް ދިމާވަނީ ބިންބީގައި މަތީ މިންވަރަކަށް ފައިބަރު، އަދި ޕޮލީފީނޯލް ހުންނާތީ އެވެ. ބިންބި އަކީ "ގްލައިސިމިކް އިންޑެކްސް" ދަށް ކާނާގެ ބާވަތެކެވެ. މިބާވަތުގެ ކާނާ ބޭނުންކުރުމުން ކުއްލިއަކަށް ލޭގައި ހަކުރުގެ މިންވަރު މަތިވުމުގެ ގާބިލިއްޔަތު ދަށްކުރެއެވެ. ނުވަތަ ލޭގައި ހަކުރުގެ މިންވަރު މަތިކުރުމުގެ ގާބިލިއްޔަތު މިފަދަ ކާނާގެ ބާވަތްތަކުގައި ކުޑައެވެ. 

ލޭގައި ސަރުބީގެ މިންވަރު ދަށްކުރުން : ބިންބީގައި ހުންނަ އެމިނޯއެސިޑްތައް ކަމުގައިވާ ލެސިތިން، އަދި މެތިއަނިން ގެ ސަބަބުން، ފުރަމޭގައި އިތުރުވެފައި ހުންނަ ސަރުބީތައް ބޭރުކޮށްދީ، ހަށިގަނޑުގައި ހުންނަ ސަރުބީގެ މިންވަރު ދަށްކޮށްދެއެވެ. މީގެ އިތުރުން ބިންބީގައި ހުންނަ އެމިނޯއެސިޑް "ތްރިއަނިން" ގެ ސަބަބުން ފުރަމޭގައި ސަރުބީ އުފެދުން ދަށްކޮށްދީ، ހަށިގަނޑުގައި ހުންނަ ސަރުބީގެ މިންވަރު ދަށްކޮށް ދެއެވެ. މީގެ އިތުރުން ބިންބީގައި މަތީ މިންވަރަކަށް ފައިބަރު ހުރުމަކީ ވެސް ސަރުބީ ދަށްކޮށްދޭނެ ކަމެކެވެ. 

ލޭމަދުވުމުން ރައްކާތެރިކޮށްދިނުން : ބިންބި އަކީ ކާނާގައި ހިމެނޭ ދަގަނޑުގެ ރަގަޅު މަޞްދަރެކެވެ. އެހެންކަމުން ބިންބި ބޭނުންކުރުމަކީ ލޭމަދުވުމުން ރައްކާތެރިކޮށްދޭނެ ކަމެކެވެ. 

ހަށިގަނޑު ހަމައަކަށް އެޅުވުމަށް އެހީތެރިވުން : ބިންބި އަކީ ތަބީއީ ގޮތުން ވެސް ހަށިގަނޑު ހަމައަކަށް އެޅުވުމަށް ބޭނުންކުރެވިދާނެ ފައިދާހުރި ބާވަތެކެވެ. އެހެންވެ ހާސްވެ ފިކުރުބޮޑުވުން، މާޔޫސްވެ، ދެރަވެ މޮޅިވެރިވުން، ނިދިނައުން، އަދި ބޮލުގެ އެއްފަޅީގައި ރިހުން ފަދަ ހާލަތްތަކުގައި ބިންބި ބޭނުންކުރުމުން ލުއިކަން ލިބޭކަން ފާހަގަ ކުރެވެއެވެ. 

އެމިނޯއެސިޑްގެ ރަގަޅު މަޞްދަރަކަށްވުން : ބިންބި އަކީ ހަށިގަނޑަށް ބޭނުންތެރި އެމިނޯއެސިޑް ތަކުގެ ރަގަޅު މަޞްދަރެކެވެ.  ބިންބީގައި އެކުލެވޭ އެމިނޯއެސިޑް ތަކުގެ ތެރޭގައި ޓްރައިޕްޓަފާން، ތްރިއަނިން، ވޭލިން، އައިސޯލިއުސިން، އަދި މެތިއަނިން ހިމެނެއެވެ. އައިސޯލިއުސިން އަކީ މަސްތައް މަރާމާތުކޮށްދީ، ލޭއުފައްދައި، ކަށިތައް އުފައްދައި، ހަމުގެ ދުޅަހެޔޮކަން އިތުރުކޮށްދޭ މާއްދާ އެކެވެ. ވޭލިން އަކީ ހަށިގަނޑުގެ ޓިޝޫތައް މަރާމާތުކޮށްދީ، ހަށިގަނޑުގައި ހިންގާ މެޓަބޮލިޒަމްގެ މަސައްކަތް ހަލުވިކޮށްދޭ މާއްދާ އެކެވެ. މެތިއަނިން އަކީ ހަށިގަނޑުން ސަރުބީ ބޭރުކުރުމުގައި އެހީތެރިވެދޭ މާއްދާ އެކެވެ.  

ގުލޫޓަން ނުހުރުން : ބިންބީގައި ގުލޫޓަން ނުހުރުމަކީ "ސިލިއެކް ޑިޒީޒް" ހުންނަ މީހުންނަށް ފަސޭހަކަމާއެކު ބިންބި ބޭނުންކުރެވޭނެ ކަމެކެވެ. ގޮވާމުގެ ގިނަ ބާވަތްތަކުގައި ގުލޫޓަން ހުރުމަކީ އެފަދަ ބާވަތްތައް ސިލިއެކް ޑިޒީޒް ހުންނަ މީހުން ކެއުމުން ދުރުވާންޖެހޭ ކަމެކެވެ. ސިލިއެކް ޑިޒީޒް އަކީ ގުލޫޓަން އާއި ނުގުޅުމުން ދިމާވާ މައްސަލަ އެކެވެ. 

ކިރުއެރުން އިތުރުވުން : ގާތުން ކިރުދޭ މައިން ގަވާއިދުން ބިންބި ބޭނުންކުރުމަކީ އުރަމައްޗަށް ކިރުއެރުން އިތުރުކޮށްދޭ ކަމެކެވެ. މީގެ އިތުރުން ބިންބި ބޭނުންކުރުމަކީ އުރަމަތީގައި އުފެދޭ ކިރުގައި ކެލްސިއަމް، ދަގަނޑު، އަދި ހަށިގަނޑަށް ބޭނުންވާ މުހިއްމު އެމިނޯ އެސިޑްތައް ހިމެނޭނެ ކަމެކެވެ. 

ހަމުގެ ދުޅަހެޔޮކަން އިތުރުކުރުން : ބިންބި އަކީ ހަމުގެ ދުޅަހެޔޮކަން އިތުރުކޮށްދީ، ހަމަށް ވާންކަމާ ތާޒާކަން ގެނެސްދިނުމަށް ބޭނުންކުރެވިދާނެ ރަގަޅު ބާވަތެކެވެ. ބިންބީގައި ހިމެނޭ ލައިސިން އަދި މެތިއަނިން އަކީ ހަމުގައި ހުންނަ ކޮލަޖަން ފައިބަރު އުފެއްދުމަށް އެހީތެރިވެދޭ މާއްދާ ތަކެކެވެ. ކޮލަޖަން އަކީ ހަމުގައި ރޫޖެހުން ކުޑަކޮށްދީ، ހަމަށް ވާންކަން ގެނެސްދޭ މާއްދާ އެކެވެ. 

މައުލޫމާތު :

·         http://www.medindia.net/patients/lifestyleandwellness/health-benefits-of-ragi.htm

·         http://www.thehealthsite.com/fitness/did-you-know-these-10-health-benefits-of-ragi-or-nachni/

·         http://www.scind.org/1/Health/wonderful-finger-millet-amazing-nutritional-value-to-keep-you-healthy8230.html

·         http://www.thefitindian.com/10-best-health-benefits-of-ragi-4-oil-free-recipes-for-weight-loss/

·         http://vegweightlossdiets.com/good-diet/ragi-flour-nutritional-value-and-health-benefits/

·         http://www.fao.org/docrep/t0818e/T0818E0b.htm

·         http://www.researchgate.net/profile/Latha_Palaniappan/publication/236074583_Finger_Millet_%28Ragi_Eleusine_coracana_L.%29_A_Review_of_Its_Nutritional_Properties_Processing_and_Plausible_Health_Benefits/links/0c9605307a6247de81000000.pdf