މާބަނޑުދުވަސްވަރު ފުރަގަސްފަރާތު ބަލީގެ އުނދަގޫވުން

މާބަނޑު ދުވަސްވަރު - ފުރަގަސްފަރާތު ބަލި

މާބަނޑު ދުވަސްވަރު ފުރަގަސްފަރާތު ބަލީގެ އުދަނގޫތައް ކުރިމަތިވުމަކީ އާންމު ކަމެކޭ ބުނެވިދާނެ އެވެ. ބަލިވެއިންނަ ކޮންމެ 10 މީހުންގެ ތެރެއިން އެކަކަށް ފުރަގަސްފަރާތު ބަލީގެ އުދަނގޫތައް ކުރިމަތިވާކަން ފާހަގަ ކުރެވެއެވެ. އާންމު ގޮތެއްގައި މިބަލީގެ އުދަނގޫތައް ފެންނަނީ މާބަނޑުވުމަށްފަހު، ފަހު 3 މަސް ދުވަހުގެ ތެރޭގައެވެ. ފުރަގަސް ފަރާތު ބައްޔަކީ ފުރަގަސްފަރާތު ދޮރުގެ ވަށައިގެން ހުންނަ ނުސާފުލޭ ދައުރުކުރާ ހޮޅިތައް ދުޅަވެ، ފުއްޕުމެވެ. މިއީ ވަރަށް ވޭންހުރި ކަމެކެވެ. ބައެއް މީހުންނަށް ފުރަގަސްފަރާތު ބަލީގެ އުދަނގޫ އެންމެ ފުރަތަމަ ވެސް ފެންމަތިވަނީ މާބަނޑު ދުވަސްވަރުކަމުގައި ވުމަކީ ވެދާނެ ގޮތެކެވެ. ބަލިވެއިނުމުގެ ކުރިން ފުރަގަސްފަރާތް ފޭބުން ފަދަ ކަމެއް ހުރިނަމަ، މާބަނޑު ދުވަސްވަރު ފުރަގަސްފަރާތު ބަލީގެ އުދަނގޫތައް ފެނުމަކީ ވަރަށް ގާތް ކަމެކެވެ. ބައެއް ފަހަރު ވިހެއުމުގެ ތެރޭގައި ފުރަގަސްފަރާތް ފައިބާގޮތް ދިމާވުމަކީ ވެސް ވެދާނެ ގޮތެކެވެ. ވިހެއުމަށްފަހު އަންނަ ފުރަތަމަ ދެތިން ހަފްތާގެ ތެރޭގައި މިބަލީގެ އުދަނގޫ ކޮންމެ 4 އަންހެނުންގެ ތެރެއިން އެކަކަށް ކުރިމަތިވެއެވެ. 

ސަބަބު

ފުރަގަސްފަރާތު ބައްޔަކީ ބަނޑުހިކުމާ ވެސް ގުޅުންހުރި ކަމެކެވެ. ބަނޑުހިކުމާއެކު، މާބަނޑު ދުވަސްވަރު ފުރަގަސް ފަރާތަށް ބާރުބޮޑުވެ، ބޮޑުވަމުން އަންނަ ރަހިމުން ނުސާފުލޭ ދައުރުކުރާ ލޭހޮޅިތަކަށް ފިއްތުމަކީ މާބަނޑު އަންހެނުންނަށް ފުރަގަސްފަރާތު ބަލި މެދުވެރިވާ މައިގަނޑު ސަބަބެވެ. ގިނައިރު ކޮއްޅަށް ހުރުމަކީ ވެސް ފުރަގަސްފަރާތު ބަލީގެ އުދަނގޫތައް މެދުވެރިވުމަށް މަގުފަހިކުރާ ކަމެކެވެ. މާބަނޑު ދުވަސްވަރު އިތުރުވެގެންދާ ޕްރޯޖެސްޓަރޯން ހޯރމޯންގެ ސަބަބުން، ލޭހޮޅިތައް ފުޅާވުމަކީ ވެސް ފުރަގަސްފަރާތުގެ ވަށައިގެން ހުންނަ ނުސާފުލޭ ދައުރުވާ ލޭހޮޅިތައް ފުއްޕައި، ފުރަގަސްފަރާތް ފޭބުމަށް މެދުވެރިވެދާނެ ސަބަބެކެވެ. ޕްރޯޖެސްޓަރޯން ހޯރމޯންގެ ސަބަބުން ގޮހޮރުގެ ހަރަކާތްތައް ލަސްކޮށް، ބަނޑުހިކުމަށް މަގުފަހިކުރުވައެވެ. 

މިކަން ކުރިމަތިވަނީ ފުރަގަސް ފަރާތު ދޮރުގެ ވަށައިގެންވާ ލޭނާރުތައް ދުޅަވެ ފުއްޕުމުގެ ސަބަބުންނެވެ.މިގޮތަށް ދުޅަވެ،ފުއްޕަން ދިމާވަނީ ބޮޑުވަމުން އަންނަ ރަހިމުން މިލޭނާރުތަކަށް ފިއްތާތީއެވެ.  ބަނޑުހިކުންކުރިމަތިވެފައި ވާނަމަ ފުރަގަސްފަރާތު ބަލި އިތުރަށް ގޯސްވެ، ފުރަގަސްފަރާތް ފައިބާގޮތް މެދުވެރިވެއެވެ. މީގެ އިތުރުން ފުރަގަސްފަރާތު ދޮރުގައި ކަހާހިރުވުމާއި،ރިއްސުން، ބޮޑުކަމުދާއިރު ލޭއައުމަކީ ފުރަގަސްފަރާތު ބަލި ހުންނަނަމަ ފެނިދާނެ އަލާމާތްތަކެވެ. 

ފުރަގަސްފަރާތުގައި ދުޅަވެފައި ހުންނަ ލޭނާރުތައް ކުޑަކުޑަ ފެހި އޮށެއްގެ ސައިޒުން ފެށިގެން ގޮސް، މޭބިސްކަދުރެއްގެ ސައިޒާ އެއްވަރަށް ހުރުމަކީ ވެދާނެ ގޮތެކެވެ. ފުރަގަސްފަރާތު ބަލީގެ އަސަރު ބައެއް ފަހަރު ބޭރުފުށަށް ނުފެނި ހަމައެކަނި ފުރަގަސްފަރާތުގެ އެތެރޭގައި ހުރެދާނެ އެވެ. މިއީ އެތެރެއަށް ފުރަގަސްފަރާތް ފޭބުމެވެ. އާންމު ގޮތެއްގައި ދިވެހިން މިކިޔާ ފުރަގަސްފަރާތް ފޭބުމަކީ ފުރަގަސްފަރާތު ބަލީގެ ބޭރަށް ނިކުންނަ ވައްތަރެވެ. މިވައްތަރުގައި ދުޅަވެ ފުއްޕާފައިވާ ލޭނާރުތައް ބޭރަށްނިކުމެ ފައިބައިފައި ހުންނާނެ އެވެ. 

މާބަނޑު ދުވަސްވަރު ފުރަގަސްފަރާތު ބަލީގެ އުދަނގޫތައް ކުޑަކުރުމަށް ކުރެވިދާނެ ކަންތައްތައް

ވިހެއުމަށް ފަހު ކުރުމުއްދަތެއްގެ ތެރޭގައި ގިނަ މީހުންނަށް ފުރަގަސްފަރާތު ބަލީގެ އުދަނގޫތައް ލުއިވެ ރަގަޅުވެގެން ދެއެވެ. ނަމަވެސް އާދައިގެ ވަރަކަށް އުދަނގޫތައް ކޮންމެ 7 މީހުންގެ ތެރެއިން އެކަކަށް ކުރިމަތިވެއެވެ. އަދި އޮޕަރޭޝަނަކށް ދާންޖެހޭ ވަރަށް ބޮޑަށް ފުރަގަސްފަރާތު ބަލީގެ އުދަނގޫތައް މެދުވެރިވަނީ ކޮންމެ 40 މީހުންގެ ތެރެއިން އެކަކަށެވެ.

މާބަނޑު ދުވަސްވަރު ކުރިމަތިވާ ފުރަގަސްފަރާތު ބަލީގެ އުދަނގޫތައް ކުޑަކުރުމަށް އަންނަނިވި ކަންތައްތައް ކުރެވިދާނެ އެވެ.

·         ގިނަގިނައިން ދިޔާ އެއްޗެތި ބުއިމާއި، ފައިބަރު އެކުލެވޭ ކާނާ ބޭނުންކުރުން

·         މާގިނަ އިރުކޮޅަށް ނުވަތަ އިށީދެ ނުއިނުން

·         ތާފަނާ ފެނުން ދުވާލަކު 3 ނުވަތަ 4ފަހަރު ފެންވެރުން ( މިގޮތަށް ފެންވަރާއިރު ބޭކިން ސޮޑާ އެޅިދާނެއެވެ)

·         ކަސްރަތު ކުރުން

·         ފުރަގަސްފަރާތު ބައްޔަށް ޚާއްޞަކޮށްގެން އުފައްދާފައި ހުރި ކްރީމެއް ނުވަތަ "ބޭކިންގ ސޮޑާ" ކަހަލަ އެއްޗެއް ހިރުވާ ކަހާ ހިސާބުގައި އުގުޅިދާނެއެވެ. މިގޮތަށް ހެދުމުން ހިރުވުން ކުޑަކޮށްދޭނެ އެވެ.

·         ފޮތިގަނޑަކަށް ގަނޑުފެން އަޅައިގެން "އައިސްޕެކް" ތައްޔާރުކޮށް، ފުރަގަސްފަރާތް ފައިބާފައިވާ ހިސާބު ބޮޑިތާންކުރުން : މިގޮތަށް ހެދުމުން ދުޅަތިރިކޮށްދީ، ތަދުކަނޑުވައިދޭނެ އެވެ.

·         ކޮންމެ ދުވަހަކު ދެތިން ފަހަރު 15-10 ވަރަކަށް މިނިޓް ވަންދެން ބޮޑު ތަށްޓަކަށް ތާފަނާ ފެން އެޅުމަށްފަހު، އޭގެ ތެރެއަށް އެރިއިނުން : މިއީ ވެސް ދުޅަތިރިކޮށްދީ، ތަދުކަނޑުވައިދޭނެ ކަމެކެވެ.

·         ބޮޑުކަމު ގޮސް ނިމިގެން ކޮންމެ ފަހަރަކު ފުރަގަސްފަރާތް ހުދުކުލައިގެ މަޑު ޓިޝޫއަކުން ސާފުކުރުން

މާބަނޑު ދުވަސްވަރު ފުރަގަސްފަރާތު ބަލިން ރައްކާތެރިވުމަށް ކުރެވިދާނެ ކަންތައްތައް

·         ބަނޑުހިކުމުން ރައްކާތެރިވުން : ބަނޑުހިކުމުން ރައްކާތެރިވުމަށް :-

o       ފައިބަރުން މުއްސަދި ކާނާގެ ބާވަތްތައް ބޭނުންކުރުން

o       ގިނައިން ދިޔާތަކެތި ބޭނުންކުރުން

o       ޕްރޫން ޖޫސް ބޭނުންކުރުން

o       ވީހާވެސް ގިނައިން މޭވާއާއި ތަރުކާރީގެ ބާވަތްތައް ބޭނުންކުރުން

o       ގަވާއިދުން ކަސްރަތުކުރުން

·         ބޮޑުކަމުދާން ޖެހުމުން ނުގޮސް ހިފަހައްޓައިގެން ނުހުރުން

·         ބޮޑުކަމުދާއިރު ބާރުނުލުން

·         ކޮންމެ ދުވަހަކު "ކީޖެލް އެކްސަސައިޒު" ހެދުން : މިއީ ފުރަގަސްފަރާތު ދޮރުގެ ވަށައިގެން ހުންނަ މަސްތައް ވަރުގަދަކޮށްދީ، އެހިސާބުގެ ލޭދައުރުވުން ރަގަޅުކޮށްދޭ ކަސްރަތެކެވެ.

·         މާގިނަ އިރުކޮޅަށް ނުވަތަ އިށީދެ ނުއިނުން : މަސައްކަތުގެ ގޮތުން ގިނައިރު އިށީދެ އިންނަން ޖެހޭނެމަ ދޭތެރެ ދޭތެރެއިން ތެދުވެލާ ހިނގާލާ ހެދުން ރަގަޅެވެ.

މައުލޫމާތު :

·         http://americanpregnancy.org/pregnancy-health/hemorrhoids-during-pregnancy/

·         http://www.babycenter.com/0_hemorrhoids-during-pregnancy_244.bc

·         http://www.babycentre.co.uk/a244/piles-in-pregnancy