މެޓަބޮލިކް ސިންޑްރޯމް

 

މެޓަބޮލިކް ސިންޑްރޯމް

މެޓަބޮލިކް ސިންޑްރޯމް (metabolic syndrome) އަކީ ހިތުގެ ބަލި، ހަކުރުބަލި އަދި ސްޓްރޯކްޖެހުމަށް މަގުފަހިކުރާ ތަފާތު 5 ހާލަތެއް އެކުއެކީ ހުރުމެވެ. ނޫނީ މެޓަބޮލިކް ސިންޑްރޯމް މާނަކުރެވެނީ ހިތާއިލޭހޮޅިތަކުގެ ބަލިތަކަށް މަގުފަހިކުރާ ވަކި ހިރާސްތަކެއް އެމީހެއްގެ ކިބައިގައި އަށަގެންފައި ހުރުމަށެވެ. މެޓަބޮލިކް ސިންޑްރޯމް އަކީ ހަކުރުބަލި، ހިތުގެބަލި އަދި ސްޓްރޯކް ޖެހުމުގެ ހިރާސް ނޫނީ އެ 3 ބަލި ކުރިމަތިވުމުގެ ހިރާސް އިތުރުކުރާ ކަމެކެވެ. އެގޮތުން މެޓަބޮލިކް ސިންޑްރޯކް ކަމަށް ކަނޑައަޅަނީ މިގޮތުން މަގުފަހިކުރާ ނޫނީ ހިރާސް ގެ ގޮތުގައި ބަލާ ހާލަތްތަކުގެ ތެރެއިން މަދުވެގެން 3 ހާލަތެއް ކުރިމަތިވެފައިވާނަމަ އެވެ.

އާންމު ގޮތެއްގައި މިއިން ކޮންމެ ކަމަކީ ހިތާއި ލޭހޮޅިތަކުގެ ބަލިތަކަށް މަގުފަހިކުރާ ހިރާސް އެއް ކަމުގައި ވިޔަސް، މީހެއްގެ ކިބައިގައި މީގެ ތެރެއިން 3 ހިރާސް ނުވަތަ އެއަށްވުރެ ގިނަ ހިރާސް ހުރިނަމަ، އަދި މެޓަބޮލިކް ސިންޑްރޯމް ހުރިކަމަށް ބެލެވޭނަމަ، ހިތާލޭހޮޅިތަކަށް ކުރިމަތިވާ ނުރައްކާތެރި ހާލަތްތައް މިސާލަކަށް ހާޓް އެޓޭކް އަދި ސްޓްރޯކް ޖެހުން ފަދަ ކަންކަން ކުރިމަތިވުމުގެ ފުރުޞަތު އިތުރުވެ، މަތިވެގެން ދެއެވެ. މިސާލަކަށް ލޭމައްޗަށްދިއުމަކީ ހިތާއިލޭހޮޅިތަކުގެ ބަލިތަކަށް މަގުފަހިކުރާ ހިރާސް އެއް ކަމުގައި ވިޔަސް، ލޭމައްޗަށް ދިއުމާއެކު، ލޭގެ ހަކުރު މަތިވެ، އަދި އުނަގަނޑާއި ހަމައިން ހަށިގަނޑު ފަލަވެފައިވާނަމަ، ހިތާއި ލޭހޮޅިތަކަށް ދިމާވާ ބަލިތައް ނުވަތަ މައްސަލަތައް ކުރިމަތިވުމުގެ ފުރުޞަތު އެތައް ގުނައެއް އިތުރުވެގެން ދެއެވެ(ހާރޓް.އޯރގް، 2023).

މެޓަބޮލިކް ސިންޑްރޯމް އަކީ އެކަމުގެ ސަބަބުން ހިތުގެ ބަލިތައް، ހަކުރުބަލި، ސްޓްރޯކް ޖެހުން އަދި ލޭހޮޅީގައި ސަރުބީ ހަރުލުން އިތުރުވާ ބަލިތައް މިސާލަކަށް ލޭހޮޅިތައް ހަރުއެރުން ފަދަ ކަންތައްތައް ކުރިމަތިވުމުގެ ހިރާސް އިތުރުކުރުވާ ހާލަތެކެވެ. މެޓަބޮލީކް ސިންޑްރޯމް އަށް މަގުފަހިކުރާ ހާލަތްތަކުގެ ތެރޭގައި ހަށިގަނޑުގެ ބަރުދަން ހުންނަށްޖެހޭ މިންވަރަށްވުރެ ތަންކޮޅެއް ބަރުވުން، ހަށިގަނޑު ބަރުދަން އާދަޔާ ޚިލާފަށް އިތުރުވެ ފަލަވުން، ހަށިގަނޑުގައި އިންސިއުލިން އެކަށޭނަ ގޮތަށް މަސައްކަތްކުރުން، ޖިސްމާނީ ހަރަކާތްތެރިކަން ދަށްވުން، އުމުރުން ދުވަސްވުން އަދި ވާރުތަވާގޮތް ހުރުން ފަދަ ކަންތައްތައް ހިމެނެއެވެ(ހާރޓް.އޯރގް، 2023).

މެޓަބޮލިކް ސިންޑްރޯމް އަކީ ނުރައްކާތެރި ހާލަތެއް ކަމުގައި ވިޔަސް، ހަށިގަނޑުގެ ބަރުދަން އެއްވަރެއްގައި ހިފެހެއްޓުން، ޖިސްމާނީ ހަރަކާތްތެރިކަން އިތުރުކުރުން، މިންހެޔޮކޮށް ކެއިންބުއިން ބެހެއްޓުން، ލޭގެ ޕްރެޝަރު، ލޭގެ ހަކުރު އަދި ލޭގައި ސަރުބީގެ މިންވަރު ކޮންޓްރޯލްގައި ބެހެއްޓުން ފަދަ ކަންކަން ފުރިހަމަކޮށްގެން އެކަމުން ރައްކާތެރިވެވިދާނެ އެވެ(ހާރޓް.އޯރގް، 2023).

މެޓަބޮލިކް ސިންޑްރޯމް ހުންނަ ގިނަމީހުންގެ ކިބައިގައި އިންސިއުލިން ރެސިސްޓެންސް (ހަށިގަނޑުގެ މަސް، ފުރަމޭ އަދި ސަރުބީގައި ހުންނަ އިންސިއުލިންއަށް އިޖާބަދޭންޖެހޭ ސެލްތައް އިޖާބަ ނުދިނުން ނޫނީ އިޖާބަ ދޭން ދެކޮޅުހެދުން) ހުރެއެވެ. އިންސާނާގެ ހަށިގަނޑަށް އެތެރެވާ ހަކުރު ހަކަތައިގެ ގޮތުގައި ބޭނުންކުރުމަށް ސެލް ނުވަތަ ދިރުތަކަށް ގެންދަނީ އިންސިއުލިންގެ އެހީތެރިކަމާ އެކުގައެވެ. މެޓަބޮލިކް ސިންޑްރޯމް ހުންނަ ގިނަ މީހުން އާދަޔާ ޚިލާފަށް ބަރުހެލިވެ ފަލަވުމުން، އެމީހުންގެ ހަށިގަނޑުގައި ހުންނަ ދިރުތަކުން އިންސިއުލިން އަށް އިޖާބަ ދިނުމަށް ދަތިތަކާ ކުރިމަތިވެއެވެ. ނޫނީ ދެކޮޅު ހަދައެވެ. މިގޮތުން ކުރިމަތިވާ ދެކޮޅުހެދުމަށް "ގަދަދެއްކޭވަރަކަށް" ހަށިގަނޑުން އިންސިއުލިން ނުއުފެއްދޭނަމަ، ލޭގައި ހަކުރުގެ މިންވަރު މަތިވެ، ހަކުރު ބަލި ފެންމަތިވެގެން ދެއެވެ. މިގޮތުން ހަކުރުބަލި ފެންމަތިވެގެން ދިއުމަކީ މެޓަބޮލިކް ސިންޑްރޯމްގެ ފެށުން ކަމުގައި ވެސް ވެދާނެއެވެ. (ހޮޕްކިންސްމެޑިސިން.އޯރގް، 2024).

މެޓަބޮލިކް ސިންޑްރޯމް ހުރި ކަމަށް ކަނޑައެޅުމުގައި ބަލާ ކަންތައްތައް

މެޓަބޮލިކް ސިންޑްރޯމް އަށް މަގުފަހިކުރާ ހާލަތުގެ ގޮތުގައި ބަލާ ހިރާސްތައް ތިރީގައި މިވަނީއެވެ.

·         ލޭގައި ހަކުރު މަތިވުން : މީގެ މާނައަކީ ލޭގެ ކޮންމެ ޑެސިލިޓަރެއްގައި ހަކުރު 100 މިލިގްރާމް ނުވަތަ އެއަށްވުރެ މަތީގައި ހުރުމެވެ.

·         ލޭގައި ސަރުބީގެ ވައްތަރުތަކުގެ ތެރެއިން ރަނގަޅު ސަރުބީ ގެ މިންވަރު ދަށްވުން: މީގެ މާނައަކީ ލޭގައި ރަނގަޅު ސަރުބީގެ މިންވަރު ލޭގެ ކޮންމެ ޑެސިލިޓަރެއްގައި ފިރިހެނުންގެ 40 މިލިގްރާމް އަށްވުރެ ދަށުގައި އަދި އަންހެނުންގެ 50 މިލިގްރާމް އަށްވުރެ ދަށުގައި ހުރުމެވެ.

·         ލޭގައި ސަރުބީގެ ވައްތަރުގެ ތަކުގެ ތެރެއިން ޓްރައިގްލައިސެރައިޑް ގެ މިންވަރު މަތިވުން : މީގެ މާނައަކީ ލޭގެ ސަރުބީގެ ވައްތަރުގެ ތެރެއިން ޓްރައިގްލައިސެރައިޑްގެ މިންވަރު ލޭގެ ކޮންމެ ޑެސިލިޓަރެއްގައި 150 މިލިގްރާމް އަށްވުރެ ދަށުގައި ހުރުމެވެ.

·         އުނަގަނޑުގެ ވަށަމިން ބޮޑުވުން ނޫނީ އުނަގަނޑު ފަލަވެ، އާފަލު ބައްޓަމަށް ހުރުން ނުވަތަ ބަނޑާއި ދިމާލުން މާބޮޑަށް ފަލަވުން : މީގެ މާނައަކީ އުނަގަނޑުގެ ވަށަމިން އަންހެނުންގެ 35 އިންޗިއަށް ވުރެ ބޮޑުވުން އަދި ފިރިހެނުންގެ 40 އިންޗިއަށް ވުރެ އިތުރުވުމެވެ. އުނަގަނޑުގެ ވަށަމިން އިތުރުވުމަކީ ފަލަވުމުގެ ވައްތަރެކެވެ. އަދި މިއީ މެޓަބޮލިކް ސިންޑްރޯމް އަށް މަގުފަހިކުރާ ހިރާސް އެކެވެ. 

·         ލޭގެ ޕްރެޝަރު މަތިވުން ނޫނީ ލޭމައްޗަށްދިއުން : މީގެ މާނައަކީ ލޭގެ ޕްރެޝަރު 80/130 މިލިމީޓަރ މާކަރީ އަށްވުރެ މައްޗަށް ދިއުމެވެ. ތަބީއީ ލޭގެ ޕްރެޝަރު ކަމުގައި ބަލަނީ ލޭގެ ސިސްޓޮލީކް ޕްރެޝަރު 120މމމ އަށްވުރެ ދަށުގައި ހުރުމާއެކު އަދި ލޭގެ ޑައަސްޓޮލީކް ޕްރެޝަރު 80މމމ އަށްވުރެ ދަށުގައި ހުރުމެވެ. އާންމު ގޮތެއްގައި ފަލަވުމަކީ ލޭގެ ޕްރެޝަރު މަތިވާނެ ކަމެކެވެ. މީގެ އިތުރުން ހަށިގަނޑުގައި އިންސިއުލިންގެ މަސައްކަތް ރަނގަޅަށް ނުކުރާ މީހުންގެ ވެސް ލޭގެ ޕްރެޝަރު މަތިވާކަން ފާހަގަ ކުރެވެއެވެ.

މެޓަބޮލިކް ސިންޑްރޯމް ކުރިމަތިވަނީ ކީއްވެ؟

މެޓަބޮލިކް ސިންޑްރޯމް ކުރިމަތިވާ ސީދާ ސަބަބެއް އަދި ހޯދިފައެއް ނުވެއެވެ. މެޓަބޮލިކް ސިންޑްރޯމް ކުރިމަތިވަނީ ވަރަށް ގިނަ ކަންތައްތައް ނޫނީ ހިރާސްތައް ގުޅިލާމެހިގެންނެވެ. އާދަޔާ ޚިލާފަށް ހަށިގަނޑު ބަރުހެލިވެ، ފަލަވުމާއި، ހަށިގަނޑުގެ ޖިސްމާނީ ހަރަކާތްތެރިކަން ދަށްވުމަކީ މެޓަބޮލިކް ސިންޑްރޯމް ކުރިމަތިވުމަށް މަގުފަހިކުރާ ހިރާސްތައް ކުރިމަތިވުމުގެ ފުރުޞަތު އިތުރުކުރާނެ ކަމެކެވެ. މީގެ ތެރޭގައި ސަރުބީ މަތިވުން، އިންސިއުލިން މަސައްކަތް ކުރުމަށް ދެކޮޅުހެދުން ނޫނީ އެކަށޭނަ ގޮތުގައި މަސައްކަތް ނުކުރުން، އަދި ލޭގެ ޕްރެޝަރު މަތިވުން ހިމެނެއެވެ. މިހިރާސްތަކުގެ ސަބަބުން ހަކުރުބަލި އަދި ހިތާއިލޭހޮޅިތަކުގެ ބަލިތަކަށް (ހާޓް އެޓޭކް ޖެހުން، ސްޓްރޯކްޖެހުން ފަދަ) މަގުފަހި ކުރެއެވެ (ހޮޕްކިންސްމެޑިސިން.އޯރގް، 2024).

އިންސިއުލިން ހަށިގަނޑުގައި އެދެވޭ ގޮތުގައި މަސައްކަތްނުކުރުމާއި، މެޓަބޮލިކް ސިންޑްރޯމް ކުރިމަތިވުމާއި ގުޅުން އޮންނާތީ، ވަރަށް ގިނަ ޞިއްހީ މާހިރުން ވެސް ގަބޫލުކުރަނީ އިންސިއުލިން ހަށިގަނޑުގައި އެދެވޭގޮތުގައި މަސައްކަތް ނުކުރުމަކީ މެޓަބޮލިކް ސިންޑްރޯމް ކުރިމަތިވާ ސަބަބަށް ވެދާނެ ކަމަށެވެ. ނަމަވެސް މި ދެ ހާލަތު އެއް ހާލަތު އަނެއް ހާލަތާ ސީދާ ގުޅުން އޮންނަކަން އަދި ހޯދިފައެއް ނުވެއެވެ. އަނެއް ބަޔަކު ދެކޭގޮތުގައި ހޯރމޯން އަންނަ ބަދަލުގެ ސަބަބުން ދިރިއުޅުމުގައި ކުރިމަތިވާ ދާއިމީ (ދިގުމުއްދަތަކަށް ދެމިހުންނަ) ފިކުރުބޮޑުވުމާއި ކަންބޮޑުވުން ފަދަ ކަންކަމާއި ވިދިގެން އުނަގަނޑާއި ހަމައިން ފަލަވުން، އިންސިއުލިން އެދެވޭ ގޮތުގައި މަސައްކަތް ނުކުރުން ނޫނީ މަސައްކަތްކުރަން ދެކޮޅު ހެދުން އަދި ލޭގައި ސަރުބީ މަތިވުން ފަދަ ކަންކަމުގެ ސަބަބުން މެޓަބޮލިކް ސިންޑްރޯމް ކުރިމަތިވާ ކަމަށެވެ. (ހޮޕްކިންސްމެޑިސިން.އޯރގް، 2024).

މެޓަބޮލިކް ސިންޑްރޯމް އަށް މަގުފަހިވާ އެހެން ކަންތައްތަކުގެ ތެރޭގައި ވިރާސީގޮތުން އަންނަ ބަދަލުގެ ސަބަބުން ލޭގައި ސަރުބީ ބައިބައިކޮށް ނޫނީ ހިމުންކޮށް މުގުރުމުގެ މަސައްކަތަށް ބަދަލުއައުން، އުމުރުން ދުވަސްވުން އަދި ސަރުބީ ހަށިގަނޑުގެ ހިސާބުތަކަށް ބެހުމަށް ނުކުޅެދުން ފަދަ ކަންތައްތައް ހިމެނެއެވެ (ހޮޕްކިންސްމެޑިސިން.އޯރގް، 2024).

ބައެއް މީހުންނަށް އުފެދުމުގައި ވިރާސީ ގޮތުން ހުންނަ ކަންތައްތަކެއްގެ ސަބަބުން މެޓަބޮލިކް ސިންޑްރޯމް ކުރިމަތިވުމުގެ ހިރާސް ބޮޑަސް އަނެއްބައި މީހުންނަށް މެޓަބޮލިކް ސިންޑްރޯމް ކުރިމަތިވަނީ ދިރިއުޅުމުގެ ވައްޓަފާޅީގައި ގެންގުޅެވޭ އާދަތަކުގެ ސަބަބުންނެވެ. ނޫނީ މެޓަބޮލިކް ސިންޑްރޯމް ކަން ކަނޑައެޅުމަށް ބަލާ 5 ހިރާސް އަށް މަގުފަހިވާ އާދަ ނޫނީ ހާލަތްތަކާ ކަންތައްތަކުގެ ސަބަބުންނެވެ. މި 5 ހިރާސް އަކީ ލޭގައި ހަކުރު މަތިވުން، ލޭގެ ޕްރެޝަރު މަތިވުން، ބީއެމްއައި މަތިވެ ފަލަވުން ނޫނީ އުނަގަނޑާއި ހަމައިން ފަލަވުން، ލޭގައި ސަރުބީގެ ވައްތަރުތަކުގެ ތެރެއިން ޓްރައިގްލެސެރައިޑް މަތިވުން އަދި ލޭގައި ނުރަނގަޅު ސަރުބީ ދަށްވުން ހިމެނެއެވެ (ހާރޓް.އޯރގް، 2023).

މެޓަބޮލިކް ސިންޑްރޯމް ކުރިމަތިވުމުގެ ހިރާސް އިތުރުވާ ކަންތައްތައް

ކޮންމެ ބައްޔެއްމެ ކުރިމަތިވުމުގެ ހިރާސްތައް އެނގިފައި އޮތުމަކީ އެކަމުން ރައްކާތެރިވުމަށް އެހީތެރިވެދޭނެ ކަމެކެވެ. މީގެ ތެރޭގައި ދިރިއުޅުމުގެ ވައްޓަފާޅި އަށް ބަދަލުގެނައުމާއި، ގަވާޢިދުން ޑޮކްޓަރަށް ދައްކައި ބަލަމުން ގެންދިއުން ހިމެނެއެވެ.

މެޓަބޮލިކް ސިންޑްރޯމް އަށް މަގުފަހިކުރާ ކަންތައްތަކުގެ އަންނަނިވި ކަންތައްތައް ހިމެނެއެވެ.

(ހ) އުމުރު : އުމުރު ދުވަސްވާވަރަކަށް މެޓަބޮލިކް ސިންޑްރޯމް ކުރިމަތިވުމުގެ ހިރާސް އިތުރުވެއެވެ.

(ށ) ނަސްލު : އެފްރިކަން އެމެރިކަން އަދި މެކްސިކަން އެމެރިކަން މީހުންނަށް މެޓަބޮލިކް ސިންޑްރޯމް ކުރިމަތިވުމުގެ ހިރާސް އިތުރެވެ. އެފްރިކަން އެމެރިކަން އަންހެނުންނަށް އެނަސްލަށް ނިސްބަތްވާ ފިރިހެނުންނަށް ވުރެ، މެޓަބޮލިކް ސިންޑްރޯމް ކުރިމަތިވުމުގެ ހިރާސް %60 އިތުރުކަން ފާހަގަ ކުރެވެއެވެ (ހޮޕްކިންސްމެޑިސިން.އޯރގް، 2024). ކަޅު މީހުންނަށް ، ދޮން މީހުންނަށްވުރެ ބޮޑަށް މެޓަބޮލިކް ސިންޑްރޯމް ކުރިމަތިވުމުގެ ހިރާސް އޮވެއެވެ (ހާރޓް.އޯރގް، 2023).  

(ނ) ހުންނަށްޖެހޭ މިންވަރަށްވުރެ ފަލަވުން ނުވަތަ އާދަޔާ ޚިލާފަށް ފަލަވެ، ބަރުހެލިވުން : އާންމު ގޮތެއްގައި ހުންނަށްޖެހޭ މިންވަރަށް ވުރެ ފަލަކަން ކަނޑައަޅަނީ ބޮޑީ މާސް އިންޑެކްސް ހޯދައިގެންނެވެ. ބޮޑީ މާސް އިންޑެކްސް އަކީ އިސްކޮޅާއި ބަރުދަނާ އަޅާ ބަލާއިރު ހަށިގަނޑުގައި ސަރުބީ ހުންނަ މިންގަނޑެކެވެ. މިމިންގަނޑު 25 އަށްވުރެ މަތިނަމަ މެޓަބޮލިކް ސިންޑްރޯމް ކުރިމަތިވުމުގެ ހިރާސް އިތުރުކަން ފާހަގަ ކުރެވެއެވެ (ހޮޕްކިންސްމެޑިސިން.އޯރގް، 2024). ފަލަވުމަކީ މެޓަބޮލިކް ސިންޑްރޯމް ކުރިމަތިވުމުގައި މުހިއްމު ދައުރެއް އަދާކުރާ ހިރާސް އެކެވެ. ބަނޑުގެ ވަށައިގެން ސަރުބީ ގިނަވެ، ބަނޑާއި ހަމައިން ފަލަވުމަކީ މެޓަބޮލިކް ސިންޑްރޯމް އާއި ވަރަށް ބޮޑަށް ގުޅިފައިވާ ކަމެކެވެ. ނަމަވެސް މިގޮތަށް މިކަން ގުޅިފައިވާ ސީދާ ސަބަބު އަދި މުޅިއަކުން ސައްހަކޮށް ހޯދިފައެއް ނުވެއެވެ. (ހާރޓް.އޯރގް، 2023).

(ރ) އެމީހެއްގެ ނޫނީ އެމީހެއްގެ އާއިލާގައި ހަކުރުބަލި ހުރުން : މާބަނޑު ދުވަސްވަރު ހަކުރުމަތިވުން ކުރިމަތިވި އަންހެނުންނާއި، އާއިލާގައި ހަކުރުބަލީގެ ދެވަނަ ވައްތަރު ހުރި މެންބަރުން ތިބޭ އަންހެނުންނަށް މެޓަބޮލިކް ސިންޑްރޯމް ކުރިމަތިވުމުގެ ހިރާސް އިތުރެވެ (ހޮޕްކިންސްމެޑިސިން.އޯރގް، 2024). ހަކުރުބަލި ކުރިމަތިވާ ސަބަބުގެ ތެރޭގައި އިންސިއުލިން ހަށިގަނޑުގައި އެދެވޭ ގޮތެއްގައި މަސައްކަތް ނުކުރުން ހިމެނެއެވެ. އިންސިއުލިން ހަށިގަނޑުގައި އެދެވޭގޮތެއްގައި މަސައްކަތް ނުކުރުމާއި، މެޓަބޮލިކް ސިންޑްރޯމް ކުރިމަތިވުމާއި ގުޅުމެއް އޮންނަކަން ހޯދިފައި ވެއެވެ (ހާރޓް.އޯރގް، 2023).

(ބ) ދުންފަތުގެ އިސްތިއުމާލުކުރުން

(ޅ) ބަނގުރާ ބުއިން

(ކ) ފިކުރުބޮޑުވުން

(އ) އިއްދައިން ކެނޑުން

(ވ) ކެއުމުގައި ތެލާއި ސަރުބީ ގިނައިން ބޭނުންކުރުން

(މ) ހަށިގަނޑުގެ ޖިސްމާނީ ހަރަކާތްތެރިކަން ދަށްވުން (ހޮޕްކިންސްމެޑިސިން.އޯރގް، 2024).

އަލާމާތްތައް

އާންމު ގޮތެއްގައި މެޓަބޮލިކް ސިންޑްރޯމްގެ ވަކި ޚާއްޞަ އަލާމާތްތަކެއް ނުހުރެއެވެ. ބައެއް މީހުންގެ ޚާއްޞަކޮށް އެމީހުންގެ ހަށިގަނޑުގައި އިންސިއުލިން އެދެވޭގޮތެއްގައި މަސައްކަތް ނުކުރާ މީހުންގެ ކަރުމަތި، ކިހިލިފަތްދޮށް އަދި އުރަމަތީގެ ދަށުގެ ހަންގަނޑު ކަޅުވުމަކީ ވެދާނެ ގޮތެކެވެ. މީގެ އިތުރުން ލޭމަތިވުން، ސަރުބީމަތިވުން އަދި ފަލަވުމަކީ ފާހަގަކުރެވިދާނެ ނިޝާން ތަކެވެ. އާންމުކޮށް ފެންނަ އަލާމާތްތަކަކީ މެޓަބޮލިކް ސިންޑްރޯމް ހުރިކަން ކަނޑައެޅުމަށް ބޭނުންކުރާ ހިރާސްތައް (ލޭމަތިވުން، ހަކުރުމަތިވުން، ފަލަވުން، ސަރުބީ މަތިވުން ފަދަ ކަންތައްތައް) ހުރުމުން ފެންނަ އަލާމާތްތަކަށް ވެސް ވެދާނެ އެވެ. (ހޮޕްކިންސްމެޑިސިން.އޯރގް، 2024). ނަމަވެސް މެޓަބޮލިކް ސިންޑްރޯމް އަށް މަގުފަހިކުރާ ހިރާސް ތަކަކީ ވެސް އެހިރާސްތަކުގެ ސަބަބުން އަލާމާތްތަކާ ނިޝާންތައް ފާހަގަވާނެ ހިރާސް ތަކެއް ނޫނެވެ.

މެޓަބޮލިކް ސިންޑްރޯމް ކަން ކަނޑައަޅާ ކަންތައްތަކާ ވިދިގެން ކުރިމަތިވާ އުދަނގޫތަކެއް ނޫނީ ފާހަގަވާ ކަންތައްތަކެއް އާންމުކޮށް ނުހުރެއެވެ. ނަމަވެސް މެޓަބޮލިކް ސިންޑްރޯމް ހުރިނަމަ ފާހަގަވާނެ އެއް މުހިއްމު އެއް ކަމަކީ މީހާގެ އުނަގަނޑާއި ހަމައިން ފަލަވުމެވެ. ލޭގައި ހަކުރުގެ މަތިވެފައިވާނަމަ، ފަހަރުގައި ހަކުރުބަލި ހުރެ އޭގެ އަލާމާތްތައް ނޫނީ ހަކުރުބަލީގެ އަލާމާތްތައް ކަމުގައިވާ ކަރުހިއްކުން، ގިނައިން ކުޑަކަމުދާންޖެހުން، ވަރުބަލިވުން އަދި ލޮލުގެ ފެނުން ފުސްވުން ފަދަ ކަންތައްތައް ކުރިމަތިވުމަކީ އެކަށީގެންވާ ކަމެކެވެ (މެޔޯކްލިނިކް، 2021). 

ދެނެގަތުން

މެޓަބޮލިކް ސިންޑްރޯމް ހުރިކަން ދެނެގަތުމަށް ނޫނީ ކަނޑައެޅުމަށް ބޭނުންކުރާ ކްރައިޓީރިއާ ތިރީގައި މިވަނީ އެވެ (ހޮޕްކިންސްމެޑިސިން.އޯރގް، 2024).

·         އުނަގަނޑާއި ހަމައިން ފަލަވުން

·         ބޮޑީމާސް އިންޑެކްސް 25 އަށްވުރެ މަތިވުން

·         ލޭގައި ސަރުބީގެ ވައްތަރުތަކުގެ ތެރެއިން ޓްރައިގްލައިސެރައިޑް ގެ މިންވަރު މަތިވުން

·         ލޭގައި ސަރުބީގެ ވައްތަރުތަކުގެ ތެރެއިން ރަނގަޅު ސަރުބީގެ މިންވަރު ދަށްވުން

·         ލޭގެ ޕްރެޝަރު މަތިވުން ނޫނީ ލޭމައްޗަށްދާތީ ބޭސް ބޭނުންކުރުން

·         ހައިބަނޑާހުރެ ހަދާ ހަކުރުގެ މިންވަރު މަތިވުން

·         ލޭގަނޑުވުން ނޫނީ އިތުރުވުން : މީގެ މާނައަކީ ލޭގަނޑުވުމަށް އެހީތެރިވެދޭ މާއްދާތައް ކަމުގައިވާ ޕްލާޒްމާ ޕްލާޒްމިނަޖެން އެކްޓިވޭޓަރ އަދި ފިބްރިނަޖެން އިތުރުވެފައި ހުރުމެވެ.

·         އިންސިއުލިން އެދެވޭ ގޮތުގައި މަސައްކަތް ނުކުރުން: މީގެ މާނައަކީ ހަކުރުބަލީގެ ދެވަނަ ވައްތަރު، ހައިބަނޑާހުރެ ހަދާ ހަކުރު ޓެސްޓުގައި ހަކުރުމަތިވުން، ނޫނީ ގުލުކޯޒް ޓޮލެރެންސް ޓެސްޓުގެ ނަތީޖާ ރަނގަޅުނުވުން ފަދަ ކަމެއް ހުރުމެވެ (ހޮޕްކިންސްމެޑިސިން.އޯރގް، 2024).

މެޓަބޮލިކް ސިންޑްރޯމް ކަން ކަނއެޅުމުގައި ނޫނީ ދެނެގަތުމުގައި މައިގަނޑު ގޮތެއްގައި ބޭނުންކުރާ ކްރައިޓީރިއާ އަކީ މިއީ ކަމުގައި ވިޔަސް، އެކި ތަންތަނުން އެކި މުއައްސަސާ، ޞިއްހަތާ ގުޅޭ ޖަމްއިއްޔާ ޖަމާޢަތްތަކުން ބޭނުންކުރާ ކްރައިޓީރިއާގައި ކުދި ތަފާތު ތައް ހުރުމަކީ އެކަށީގެންވާ ކަމެކެވެ (ހޮޕްކިންސްމެޑިސިން.އޯރގް، 2024).

ހާރޓް.އޯގް (2023) ވެބްސައިޓް (އެމެރިކަން ހާޓް އެސޯސިއޭޝަންގެ ރަސްމީ ވެބްސައިޓް) ގައި ބަޔާންކޮށްފައިވާ ގޮތުގައި މެޓަބޮލިކް ސިންޑްރޯމްކަން ކަނޑައަޅަނީ އަންނަނިވި ހާލަތްތަކުގެ 3 ނުވަތަ އެއަށްވުރެ ގިނަ ހާލަތްތައް ކުރިމަތިވެފައިވާނަމަ އެވެ.

·         އުނަގަނޑު ނޫނީ ބަނޑާއި ހަމައިން ފަލަވުން ( މިކަން މިންކުރަނީ އުނަގަނޑުގެ ވަށަމިން ބަލައިގެންނެވެ).

o       ފިރިހެނުންގެ އުނަގަނޑުގެ ވަށަމިން : 40 އިންޗިއަށްވުރެ މަތިވުން

o       އަންހެނުންގެ އުނަގަނޑުގެ ވަށަމިން : 35 އިންޗިއަށްވުރެ މަތިވުން

·         ސަރުބީގެ ވައްތަރުތަކުގެ ތެރެއިން ޓްރައިގްލެސެރައިޑް ލޭގައި ގިނަވުން

o       ޓްރައިގްލެސެރައިޑް ގެ މިންވަރު ލޭގެ ކޮންމެ ޑެސިލިޓަރެއްގެ 150 މިލިގްރާމްގައި ނުވަތަ އެއަށްވުރެ މަތީގައި ހުރުން

o       ލޭގައި ޓްރައިގްލެސެރައިޑްގެ މިންވަރު މަތިވެގެން ބޭސް ބޭނުންކުރަމުން ދިއުން

·         ސަރުބީގެ ވައްތަރުތަކުގެ ތެރެއިން ރަނގަޅު ސަރުބީ ލޭގައި ދަށްވުން

o       ލޭގައި ރަނގަޅު ސަރުބީގެ މިންވަރު މަދުވާތީ ބޭސް ބޭނުންކުރަމުން ގެންދިއުން

o       ފިރިހެނުންގެ ރަނގަޅު ސަރުބީގެ މިންވަރު : ލޭގެ ކޮންމެ ޑެސިލިޓަރެއްގައި 40 މިލިގްރާމް އަށްވުރެ ދަށްވުން

o       އަންހެނުންގެ ރަނގަޅު ސަރުބީގެ މިންވަރު : ލޭގެ ކޮންމެ ޑެސިލިޓަރެއްގައި 50 މިލިގްރާމް އަށްވުރެ ދަށްވުން

·         ލޭގެ ޕްރެޝަރު މަތިވުން ނުވަތަ ލޭމައްޗަށްދިއުން

o       ލޭގެ ޕްރެޝަރު 85/130 މިލިމީޓަރ މާކަރީ ނުވަތަ އެއަށްވުރެ މަތީގައި ހުރުން

o       ލޭމައްޗަށްދާތީ ބޭސް ބޭނުންކުރަމުން ގެންދިއުން

·         ހައިބަނޑާހުރެ ބަލާ ލޭގެ ހަކުރުގެ މިންވަރު މަތިވުން

o       ލޭގައި ހަކުރު މަތިވެގެން (ހަކުރުބަލި ހުރެގެން) ބޭސް ބޭނުންކުރަމުން ގެންދިއުން

o       ހައިބަނޑާ ހުރެ ބަލާ ލޭގެ ހަކުރުގެ މިންވަރު ލޭގެ ކޮންމެ ޑެސިލިޓަރެއްގައި 100 މިލިގްރާމް ނުވަތަ އެއަށްވުރެ މަތިވުން

ފަރުވާކުރުން

މެޓަބޮލިކް ސިންޑްރޯމް ހުރެގެން ދޭ ފަރުވާ ބަރޯސާވަނީ އަންނަނިވި ކަންތައްތަކުގެ މައްޗަށެވެ.

·         އުމުރު

·         އެމީހެއްގެ އިހާއި މިހާރުގެ ޞިއްޙީ ޙާލަތު ނުވަތަ ދުޅަހެޔޮކަން

·         ބަލިހާލަތު މިހާރު ހުރި މިންވަރު

·         ވަކި ޚާއްޞަ ބޭހެއް، އިޖުރާއާތެއް ނޫނީ ކުރަންޖެހޭ ކަމެއް އަދި ފަރުވާއެއް ތަހައްމަލުކުރެވޭ މިންވަރު

·         ހާލަތު ދެމިހުންނާނެ ކަމަށް ލަފާކުރެވޭ މުއްދަތު

·         ބަލިމީހާ ގެ ޚިޔާލާއި އިސްކަންދޭ ގޮތާއި ކަންކަން (ހޮޕްކިންސްމެޑިސިން.އޯރގް، 2024).

މެޓަބޮލިކް ސިންޑްރޯމްގެ ސަބަބުން ދިމާވެދާނެ ނުރައްކާތައް

މެޓަބޮލިކް ސިންޑްރޯމް އަކީ ހަކުރުބަލި، ހިތުގެ ބަލިތައް ފަދަ ދިގުމުއްދަތަކަށް ފަރުވާކުރަންޖެހޭ ބަލިތަކަށް މަގުފަހިކުރާ ކަމަކަށްވާތީ، ދުރާލާ ފަރުވާ ހޯދުމަކީ މުހިއްމު ކަމެކެވެ. އެކަށޭނަ ފަރުވާ ނުހޯދައިފިނަމަ، ހަކުރުބަލި، ހިތާއިލޭހޮޅިތަކުގެ ބަލިތައް ކަމުގައިވާ ހާޓް އެޓޭކް ޖެހުން އަދި ސްޓްރޯކްޖެހުން ފަދަ ކަންކަން ކުރިމަތިވުމަކީ އެކަށީގެންވާ ކަމެކެވެ. މެޓަބޮލިކް ސިންޑްރޯމް އާއި ގުޅިގެން ކުރިމަތިވެދާނެ އިތުރު ހާލަތްތައް ނުވަތަ ބަލިތަކުގެ ތެރޭގައި އަންނަނިވި ކަންތައްތައް ހިމެނެއެވެ (ހޮޕްކިންސްމެޑިސިން.އޯރގް، 2024).

·         ހަކުރުބަލިޖެހުން

·         ހިތާއި ލޭހޮޅިތަކުގެ ބަލިތައް ޖެހުން މިސާލަކަށް ހާޓް އެޓޭކްޖެހުން ނޫނީ ސްޓްރޯކްޖެހުން

·         ބިސްރަވައިގައި ސިސްޓް އުފައްދާ ބަލި (ޕޮލީސިސްޓިކް އޯވަރިއަން ސިންޑްރޯމް)

·         ފުރަމޭގައި ސަރުބީ ހަރުލުން

·         ފިތުގައި (ސަރުބީ) ހިލަ އުފެދުން

·         ނޭވާހިއްލުން

·         ނިދުމުގެ މައްސަލަތައް

·         ބައެއް ކަހަލަ ކެންސަރުތައް (ހޮޕްކިންސްމެޑިސިން.އޯރގް، 2024).

މެޓަބޮލިކް ސިންޑްރޯމް އާއި ގުޅިގެން ދީފާނެ ފަރުވާގެ ވައްތަރުތައް ތިރީގައި މިވަނީ އެވެ.

ދިރިއުޅުމުގެ ވައްޓަފާޅި ބަދަލުކުރުން

ދިރިއުޅުމުގެ ވައްޓަފާޅިއަށް ގެންނަ ބަދަލުތަކުގައި ތެރޭގައި ހަށިގަނޑުގެ ބަރުދަން ލުއިކުރަން މަސައްކަތްކުރުން، ކެއުމުގައި މިންހެޔޮ ކެއުމުގެ އުސޫލުތަކަށް ތަބާވުން، އަދި ގަވާއިދުން ކަސްރަތުކުރުން ފަދަ ކަންތައްތައް ހިމެނެއެވެ (ހޮޕްކިންސްމެޑިސިން.އޯރގް، 2024).

ހަށިގަނޑުގެ ބަރުދަން ލުއިކުރުން

ބަރުދަން ލުއިވުމުން ލޭގައި ރަނގަޅު ސަރުބީގެ މިންވަރު މަތިވެ، ނުރަނގަޅު ސަރުބީގެ މިންވަރު އަދި ސަރުބީގެ ވައްތަރެއް ކަމުގައިވާ ޓްރައިގްލައިސެރައިޑްގެ މިންވަރު ދަށްވެގެން ދެއެވެ. މީގެ އިތުރުން ބަރުދަން ލުއިވުމަކީ ހަކުރުބަލީގެ ހިރާސް ވެސް ކުޑަކޮށްދޭނެ ކަމެކެވެ (ހޮޕްކިންސްމެޑިސިން.އޯރގް، 2024).

ހަށިގަނޑުގެ ބަރުދަން ލުއިކުރުމަކީ ލޭގެ ޕްރެޝަރު ދަށްވެ، އިންސިއުލިން އަށް ހަށިގަނޑުގައި ހުންނަ ހައްސާސީކަން އިތުރުކުރާނެ ކަމެކެވެ. މީގެ އިތުރުން އުނަގަނޑާއި ހަމައިގައި ސަރުބީގެ މިންވަރު ވެސް ދަށްކޮށްދެއެވެ (ހޮޕްކިންސްމެޑިސިން.އޯރގް، 2024).

ކެއުމަށް ބަދަލުގެނައުން

ކެއުމަށް ބަދަލުގެނެސް މިންހެޔޮ ކެއުން ޚިޔާރު ކުރުމަކީ މެޓަބޮލިކް ސިންޑްރޯމްއަށް ފަރުވާކުރުމުގައި މުހިއްމު ކަމެކެވެ. އިންސިއުލިން ރެސިސްޓެންސް އަށް ނޫނީ އިންސިއުލިންއަށް އިޖާބަނުދިނުމަށް ފަރުވާކުރުމަކީ އެހެން ހިރާސްތައް ބަދަލުކުރުމަށް ވެސް ވަރަށް މުހިއްމު ކަމެކެވެ. އާންމު އުސޫލަކުން ބަލާއިރު އިންސިއުލިން ރެސިސްޓެންސް އަށް ފަރުވާކުރުމަށް އެންމެ ރަނގަޅު ގޮތަކީ ބަރުދަން ލުއިކުރުމާއި، ހަށިގަނޑުގެ ހަރަކާތްތެރިކަން އިތުރުކުރުމެވެ. މިކަން ކުރުމަށް ކެއުމަށް ގެނެވިދާނެ ބަދަލުތަކުގެ ތެރޭގައި އަންނަނިވި ކަންތައްތައް ހިމެނެއެވެ(ހޮޕްކިންސްމެޑިސިން.އޯރގް، 2024).

·         ކާނާގެ ތަފާތު ބާވަތްތައް ހިމެނޭ ކާބޯތަކެތި ކެއުމުގައި ހިމެނުން

·         ފައިދާހުރި ސަރުބީ އެކުލެވޭ ކާބޯތަކެތި ބޭނުންކުރުން : އެގޮތުން ޕޮލީސެޗުރޭޓަޑް ފެޓް އަދި މޮނޯސެޗުރޭޓަޑް ފެޓް ބޭނުންކުރުމަކީ ހިތުގެ ދުޅަހެޔޮކަން ރަނގަޅުކޮށްދީފާނެ ކަމެކެވެ. މިފަދަ ސަރުބީ ހިމެނޭ ބާވަތްތަކުގެ ތެރޭގައި އޮށާއި، މަދުގެ ބާވަތްތައް، އަދި ތެލުގެ ވައްތަރުތައް ކަމުގައިވާ ޒައިތޫނި ތެޔޮ، ސެފްލޯވަރ އަދި ކެނޯލާ ފަދަ ވައްތަރުތައް ހިމެނެއެވެ.

·         ހޯލްގްރެއިން ހިމެނޭ ބާވަތްތައް ބޭނުންކުރުން : މިސާލަކަށް ހޯލްގްރެއިން ގެ ބާވަތްތައް ކަމުގައިވާ ރަތްހަނޑޫ، ހޯލް ގްރެއިން ވީޓް ބްރެޑް، ވައިޓް ބްރެޑް ނޫނީ ހުދު ޕާނުގެ ބަދަލުގައި ބޭނުންކުރެވިދާނެ އެވެ. އެހެން ބާވަތްތަކަށް ވުރެ ހޯލް ގްރެއިން އެކުލެވޭ ކާބޯތަކެތީގެ ކާނާގެ ބައިތައް އެކުލެވޭ މިންވަރު ގިނައެވެ. ހޯލް ގްރެއިން އެކުލެވޭ ކާބޯތަކެތީގައި ފައިބަރު ގިނައިން ހުރެއެވެ. އެހެންކަމުން މިފަދަ ބާވަތްތައް ހަށިގަނޑަށް ނަގަނީ ވަރަށް ލަސްލަހުންނެވެ. މިފަދަ ވައްތަރުގެ ކާބޯތަކެތި ބޭނުންކުރުމުން ލޭގައި އިންސިއުލިންގެ މިންވަރު ކުއްލިއަކަށް މައްޗަށް ނުގެންދާނެއެވެ. ކުއްލިއަކަށް އިންސިއުލިން އިތުރުވެ މަތިވުމަކީ ބަނޑުހައިކަން އިތުރުކޮށް ކާހިތްވުން އިތުރުވާނެ ކަމެކެވެ. ބައެއް ގައިޑްލައިން ތަކުގައި ލަފާދީފައިވާ ގޮތުގައި ދުވާލަކު އާންމުކޮށް ބޭނުންކުރާ ގޮވާން ނޫނީ ގްރޭއިންގެ ދެބައިކޮށްފައި އެއްބަޔަކީ ހޯލް ގްރެއިން ކަމުގައި ހެދުން މުހިއްމެކެވެ.

·         ތަރުކާރީ އާއި މޭވާ ގިނައިން ބޭނުންކުރުން : ބައެއް ގައިޑް ލައިން ތަކުގައި ލަފާދީފައިވާ ގޮތުގައި ބޮޑުމީހަކަށް ނޫނީ ދުވާލަކު 2000 ކެލޮރީ ނޫނީ ހަކަތަ ބޭނުންވާ މީހަކު ދުވާލަކު މަދުވެގެން 2.5 ޖޯޑުގެ ތަރުކާރީއާއި 2 ޖޯޑުގެ މިންވަރަށް މޭވާ ބޭނުންކުރަން ޖެހޭނެއެވެ. ދުވާލެއްގެ މައްޗަށް ބޭނުންވާ ހަކަތަ އަށް ރިއާޔަތްކޮށް މިމިންވަރު ތަފާތުވާނެ އެވެ. ކެއުމުގައި ތަފާތު ކުލަކުލައިގެ ތަފާތު ވައްތަރުގެ މޭވާ އާއި ތަރުކާރީ ހިމެނޭތޯ ބަލާށެވެ.

·         ހަކަތަ މަދުން އެކުލެވޭ ބާވަތްތަކަށް އިސްކަންދިނުން : މިގޮތަށް ހެދުމުން ހަށިގަނޑަށް ހަކަތަ އެތެރެވާ މިންވަރު މަދުކުރެވޭނެ އެވެ (ހޮޕްކިންސްމެޑިސިން.އޯރގް، 2024).  

ކަސްރަތުކުރުން

ކަސްރަތުކުރުމަކީ ހަށިގަނޑުގެ ބަރުދަން ލުއިކޮށްދީ، މާބޮޑަށް ހަށިގަނޑު ބަރުހެލިވެ، ފަލަވެގެންދިއުން ކުޑަކޮށްދޭނެ ކަމެކެވެ. މިންހެޔޮ ކާނާ ބޭނުންކުރުމަށްވުރެ ކަސްރަތުކުރުން ހަކަތަ އެންދޭ މިންވަރު އަވަސްވެ، މަތިވެގެން ދެއެވެ (ހޮޕްކިންސްމެޑިސިން.އޯރގް، 2024).

·         ހިނގުމަކީ ކޮންމެ މީހަކަށް ވެސް ފަސޭހައިން ކުރެވިދާނެ ކަސްރަތެކެވެ. ލަސްލަހުން ހިނގަން ފަށާށެވެ. ދެތިން ހަފްތާ ވަންދެން ކޮންމެ ދުވަހަކު 30 މިނިޓް ވަރު ހިނގާށެވެ. އަދި މަޑުމަޑުން ހިނގާ މިންވަރު ނޫނީ ވަގުތު އިތުރުކުރަމުން ގެންދާށެވެ.

·         ކަސްރަތުކުރުމަކީ ލޭގެ ޕްރެޝަރު ދަށްކޮށްދީ، ލޭގައި ހަކުރުގެ މިންވަރު ވެސް ދަށްކޮށްދޭނެ ކަމެކެވެ. މީގެ އިތުރުން ކާހިތްވުން އިތުރުކޮށްދީ، ނަފްސާނީ ދުޅަހެޔޮކަން އިތުރުކޮށްދީ، ނިދުން ރަނގަޅުކޮށް ދެއެވެ. ސަރުބީ ދަށްކޮށްދީ ހަށިގަނޑުގެ ފަހެލިކަން އިތުރުކޮށް ދެއެވެ (ހޮޕްކިންސްމެޑިސިން.އޯރގް، 2024).

ބޭސް ބޭނުންކުރުން

އާންމު ގޮތެއްގައި ފަރުވާގެ ގޮތުގައި ދޭ ބޭސްތަކަކީ މެޓަބޮލިކް ސިންޑްރޯމް ހުރިކަން ކަނޑައެޅުމަށް ބަލާ ހިރާސްތައް ހުރުމުން ދީއުޅޭ ބޭސްތަކެވެ. އެގޮތުން ލޭމައްޗަށްދިއުން، ހަކުރުބަލި، ސަރުބީ މަތިވުން ފަދަ ކަންތައްތައްކަށް ފަރުވާކުރުމަށް ބޭނުންކޮށް އުޅޭ ބޭސްތައް މިހާލަތުގައި ދީފާނެ އެވެ. ނޫނީ ބޭނުންކުރަން ޖެހިދާނެއެވެ. ޚާއްޞަކޮށް ދިރިއުޅުމުގެ ވައްޓަފާޅިއަށް ގެނެވޭ ބަދަލުތަކުން އެދެވޭ ނަތީޖާއެއް ނުލިބިއްޖެނަމަ، މިބޭސްތައް ކޮންމެހެންވެސް ބޭނުންކުރަން ޖެހިދާނެއެވެ (ހޮޕްކިންސްމެޑިސިން.އޯރގް، 2024). 

ހަށިގަނޑުގެ ބަރުދަން ލުއިކުރުމަށް އޮޕަރޭޝަންކުރުން

އާދަޔާ ޚިލާފަށް ބަރުހެލިވެ ފަލަވެފައިވާ މީހުންނަށް މިއޮޕަރޭޝަންކުރުމަކީ ފައިދާހުރި ކަމެކެވެ. މިއޮޕަރޭޝަން އާންމުކޮށް ކުރަނީ ކަސްރަތުކުރުމާއި، ކެއުމުގައި ބަލައިގެން އުޅުން އަދި ބޭސް ބޭނުންކުރުން ފަދަ ކަންކަމުން އެދެވޭ ނަތީޖާއެއް ނުލިބޭނަމަ އެވެ. އެގޮތުން ކުރެވޭ ދެއޮޕަރޭޝަނަކީ އަންނަނިވި 2 އޮޕަރޭޝަން އެވެ.

·         ބަރުދަން ލުއިކުރުމަށް ހެދޭ ބޭރިއެޓްރިކް ސާޖަރީ

·         ގެސްޓްރިކް ބައިޕާސް ސާޖަރީ  

ރައްކާތެރިވުން

އާދަޔާ ޚިލާފަށް ފަލަވުން އަދި މެޓަބޮލިކް ސިންޑްރޯމް ކުރިމަތިވުމުން ދުރާލާ ރައްކާތެރިވެ ހުރުމަށް ދިރިއުޅުމުގެ ވައްޓަފާޅިއަށް ބަދަލުތައް ގެނެސް އަންނަނިވި ކަންތައްތަކަށް އިސްކަން ދެވިދާނެ އެވެ.

·         ކޮންމެ ދުވަހަކު މަދުވެގެން 30 މިނިޓްވަރު ކަސްރަތުކުރުން

·         ހެލިފެލިވެއުޅުން އަދި ޖިސްމާނީ ހަރަކާތްތެރިކަން އިތުރުކުރުން

·         މިންހެޔޮ ކާނާ އިޚްތިޔާރުކުރުން : އެގޮތުން ކެއުމުގައި ޕްރޮޓީން، ހޯލް ގްރެއިން، ތަރުކާރީ އަދި މޭވާގެ ބާވަތްތައް ހިމެނުން

·         ތެޔޮ، ލޮނު އަދި ހަކުރު ގިނަ ކާބޯތަކެތި ކެއުމުގައި ހިމެނުން މަދުކުރުން

·         ހަށިގަނޑުގެ ބަރުދަން އެއްވަރެއްގައި ހިފެހެއްޓުމަށް މަސައްކަތްކުރުން

·         ދުންފަތުގެ އިސްތިއުމާލުކުރުން ފަދަ ނޭދެވޭ އާދަތަކާ ދުރުހެލިވުން (މެޔޯކްލިނިކް، 2021).

ނޯޓް: މިއީ މައުލޫމާތު ފެތުރުމުގެ ނިޔަތުގައި ލިޔެފައިވާ ލިޔުމެކެވެ.

މައުލޫމާތު

·         https://www.hopkinsmedicine.org/health/conditions-and-diseases/metabolic-syndrome

·         https://www.heart.org/en/health-topics/metabolic-syndrome/about-metabolic-syndrome

·         https://www.mayoclinic.org/diseases-conditions/metabolic-syndrome/symptoms-causes/syc-20351916