ބްރޮކަލީ

ބްރޮކަލީ

ބްރޮކަލީ އަކީ ދިވެހިންގެ އާންމު ކެއުމުގައި ވަރަށް ގިނައިން ބޭނުންކުރާ ތަރުކާރީގެ ބާވަތެކެވެ.

ދިވެހި ނަން : ބްރޮކަލީ
އިގިރޭސި ނަން : Broccoli
ޢިލްމީ ނަން : Brassica oleracia var. Italica
ބްރޮކަލީގެ ކޮންމެ 100 ގްރާމް ގައި
އަސާސީ މާއްދާތައް		ލޮނުގެ ބާވަތްތައް
ހަކަތަ	34 ކިލޯކެލަރީ	ސޯޑިއަމް	33 މިލިގްރާމް
ކާބޯހައިޑްރޭޓް	6.64 ގްރާމް	ޕޮޓޭސިއަމް	316 މިލިގްރާމް
ޕްރޮޓީން	2.82  ގްރާމް	މަޢުދަންތައް
ފެޓް	0.37 ގްރާމް	ކެލްސިއަމް	47 މިލިގްރާމް
ފައިބަރު	2.60 ގްރާމް	ކޮޕަރ	0.049މައިކްރޯ ގްރާމް
ވިޓަމިންތައް		ދަނގަޑު	0.73 މިލިގްރާމް
ފޮލިކް އެސިޑް	63 މައިކްރޯ ގްރާމް	މެގްނީޒިއަމް	21 މިލިގްރާމް
ނިއެސިން	0.639 މިލިގްރާމް	މެންގަނީޒް	0.210 މިލިގްރާމް
ޕެންތޮނިކް އެސިޑް	0.573 މިލިގްރާމް	ފޮސްފަރަސް	-     -
ޕައިރިޑޮކްސިން	0.173 މިލިގްރާމް	ސިލެނިއަމް	12 2.5މައިކްރޯގްރާމް
ރައިބޯފްލެވިން	0.117 މިލިގްރާމް	ޒިންކް	0.41 މިލިގްރާމް
ތިއެމިން	0.071 މިލިގްރާމް	ފައިޓޯނިއުޓްރިއެންޓްތައް
ވިޓަމިން އޭ	623 އައިޔޫ	ކެރޮޓީން އަލްފާ
ވިޓަމިން ސީ	89.2މިލިގްރާމް	ކެރޮޓީން ބީޓާ	361 މައިކްރޯ ގްރާމް
ވިޓަމިން އީ	0.17 މިލިގްރާމް	ކްރިޕްޓޯޒެންތިން ބީ	1 މައިކްރޯ ގްރާމް
ވިޓަމިން ކޭ	101.6މައިކްރޯގްރާމް	ލުޓީން-ޒިއެޒެންތިން	1403މައިކްރޯ ގްރާމް

ބްރޮކަލީ އިން ލިބިދޭ ބައެއް ޞިއްޙީ ފައިދާތައް

ކެންސަރުން ރައްކާތެރިކޮށްދިނުން : ބްރޮކަލީ ބޭނުންކުރުމަކީ ކެންސަރުގެ ވަރަށް ގިނަ ވައްތަރުތަކުން ރައްކާތެރިވުމަށް ބޭނުންކުރެވިދާނެ ބާވަތެކެވެ. އެގޮތުން ބްރޮކަލީ ބޭނުންކުރުމުން ރައްކާތެރިކޮށްދީފާނެ ކެންސަރުގެ ވައްތަރުތަކުގެ ތެރޭގައި ، އުރަމަތީގެ ކެންސަރު، ރަހިމުގެ ކެންސަރު، ޕްރޮސްޓޭޓް ކެންސަރު، ފުއްޕާމޭގެ ކެންސަރު، މޭގަނޑުގެ ކެންސަރު، ގޮހޮރުގެ ކެންސަރު، އަދި ގުރުދާގެ ކެންސަރު ފަދަ ވައްތަރުތައް ހިމެނެއެވެ. ޚާއްޞަކޮށް އުރަމަތީގެ ކެންސަރާއި، ރަހިމުގެ ކެންސަރުން ރައްކާތެރިކޮށްދީފާނެ ކަމަށް ގަބޫލު ކުރެވިފައި ވެއެވެ. އެހެނީ ބްރޮކަލީ ބޭނުންކުރުމަކީ ހަށިގަނޑުގައި އިތުރުވެފައި ހުންނަ "އެސްޓްރަޖަން" ހޯރމޯންގެ މިންވަރު މަދުކޮށްދޭނެ ކަމެކެވެ. ބްރޮކަލީ ބޭނުންކުރުމުން ކެންސަރުން ރައްކާތެރިވުމަށް އެހީތެރިވެދެނީ އޭގައި ހިމެނޭ ކެންސަރާއި ދެކޮޅަށް މަސައްކަތްކުރާ ތަފާތު މާއްދާތަކުގެ ސަބަބުންނެވެ. އެގޮތުން ބްރޮކަލީގައި ހުންނަ ކެންސަރާއި ދެކޮޅަށް މަސައްކަތްކުރާ މާއްދާތަކުގެ ތެރޭގައި، "ގްލޫކަރެފެނިން"، "ޑައިއިންޑޮލައިލްމީތޭން"، ބީޓާ ކެރޮޓީން، ސިލެނިއަމް، ވިޓަމިން އޭ، އަދި ވިޓަމިން ސީ ފަދަ މާއްދާތައް ހިމެނެއެވެ.

ވިހަ ސާފުކުރުން : ބްރޮކަލީގައި ވިޓަމިން ސީ، ސަލްފަރ، އަދި ބައެއް އެމިނޯއެސިޑް ތައް ހުރުމަކީ އެބޭނުންކުރުމުން ހަށިގަނޑުން ވިހަ ސާފުކުރުމަށް އެހީތެރިވެދޭނެ ކަމެކެވެ. ބްރޮކަލީ އަކީ ފްރީ ރެޑިކަލްތައް، އަދި ޔޫރިކް އެސިޑް ފަދަ ވިހަ މާއްދާތައް، ހަށިގަނޑުން ބޭރުކުރުމަށް އެހީތެރިވެދޭ ބާވަތެކެވެ. މިއީ ހަމުގައި ބިހިނެގުން، ހިރުވައިކެހުން، މުލިހިނެގުން، ޔޫރިކް އެސިޑް މަތިވެގެން ހުޅުތައް ދުޅަވުން، ރާއްޖެ ބަލި، ގުރުދާގައި ހިލަހެދުން ފަދަ މައްސަލަތަކުން ދުރުކޮށްދޭނެ ކަމެކެވެ.

ހަމުގެ ދުޅަހެޔޮކަން ދެމެހެއްޓުން : ހަމަށް އޮމާންކަމާއި އަލިކަން ގެނެސްދެނީ ވިޓަމިން އޭ، ވިޓަމިން ބީގެ ވައްތަރުތައް، ވިޓަމިން ސީ، ވިޓަމިން އީ، އަދި ވިޓަމިން ކޭ ފަދަ ތަފާތު މާއްދާތަކުގެ ސަބަބުންނެވެ. މީގެ އިތުރުން ފޮލިކް އެސިޑް، އޮމެގާ-3- ފެޓީ އެސިޑްތައް، އަދި ބައެއް އެމިނޯ އެސިޑް ތަކަކީ ވެސް ހަމަށް ތާޒާކަން ގެނައުމުގައި ބައިވެރިވާ މާއްދާ ތަކެކެވެ. މިހުރިހާ މާއްދާތަކެއް ބްރޮކަލީގައި ހުރެއެވެ. މީގެ އިތުރުން ބްރޮކަލީގައި ހިމެނޭ ގުލޫކަރެފެނިން އަކީ އިރުގެ އަލީގެ ސަބަބުން ހަމަށް ލިބޭ ގެއްލުން ކުޑަކުރުމަށް އެހީތެރިވެދޭ މާއްދާ އެކެވެ.

ބަނޑުގެ އުދަނގޫތައް : ބްރޮކަލީގައި ގިނަ އަދަދަކަށް ފައިބަރު ހުރެއެވެ. މިއީ ހަޖަމުރަގަޅުކޮށްދީ، ގޮހޮރުގެ ހަރަކާތް އިތުރުކޮށްދީ، ބަނޑު ހިކުމުން ރައްކާތެރިކޮށްދީ، ބަނޑުފަސޭހަ ކުރުމަށް އެހީތެރިވެދޭ މާއްދާ އެކެވެ.

ހިތުގެ ބަލިތަކުން ދުރުކޮށްދިނުން : ބްރޮކަލީ ބޭނުންކުރުމަކީ ހިތުގެ ބަލިތަކުން ދުރުވެ ރައްކާތެރިވުމަށް އެހީތެރިވެދޭނެ ކަމެކެވެ. އެއީ ބްރޮކަލީގައި ފައިބަރު، އޮމެގާ-3-ފެޓީ އެސިޑް، ބީޓާ ކެރޮޓީން އަދި އެހެނިހެން ފައިދާހުރި ވިޓަމިން ތައް އެކުލެވޭތީ އެވެ. މިމާއްދާތަކަކީ ލޭގެ ޕްރެޝަރު ކޮންޓްރޯލްކޮށް، ހަށިގަނޑުގައި ސަރުބީ ދަށްކުރުމަށް އެހީތެރިވެދޭ މާއްދާ ތަކެކެވެ.

ކަށިތައް ވަރުގަދަވުން : ބްރޮކަލީ އަކީ ކެލްސިއަމް، މެގްނީޒިއަމް، ޒިންކު، އަދި ފޮސްފަރަސް ފަދަ ކަށީގެ ދުޅަހެޔޮކަމަށް ބޭނުންތެރި މާއްދާތަކުން ފުރިފައިވާ ބާވަތެކެވެ. އެހެންކަމުން ބްރޮކަލީ އަކީ ކުޑަކުދިންނާއި، އުމުރުން ދުވަސްވީ މީހުން، އަދި މާބަނޑު މީހުން ބޭނުންކުރަން ވަރަށް ރަގަޅު ތަރުކާރީގެ ބާވަތެކެވެ. އެހެނީ ބްރޮކަލީގައި ހިމެނޭ މިދެންނެވި މާއްދާތަކަކީ ކަށިތައް ވަރުގަދަކޮށް، ދުޅަހެޔޮކަންމަތީ ދެމެހެއްޓުމަށް ނުހަނު ބޭނުންތެރި މާއްދާ ތަކެކެވެ.

މާބަނޑު ދުވަސްވަރު ބޭނުންކުރުމުން ލިބިދޭ ފައިދާ : ބްރޮކަލީގައި ތަފާތު ވިޓަމިންތައް، ޕްރޮޓީންތައް، ވިހަ ބޭރުކުރާ މާއްދާތައް، އެންޓިއޮކްސިޑެންޓްތައް، ކެލްސިއަމް، ދަގަނޑު، އަދި އެހެނިހެން ތަފާތު މައުދަން ތައް ފަދަ މާއްދާތައް ހުރުމަކީ މާބަނޑު ދުވަސްވަރު ބްރޮކަލީ ބޭނުންކުރުމުން މައިމީހާއާއި ކުޑަ ދަރިފުޅަށް މަންފާ ކުރާނެ ކަމެކެވެ. ބްރޮކަލީގައި ފައިބަރު ހުރުމަކީ މާބަނޑު ދުވަސްވަރު ކުރިމަތިވާ ބަނޑުހަރުވުމުން މިންޖުވުމަށް އެހީތެރިވެދޭނެ ކަމެކެވެ. މީގެ އިތުރުން ބްރޮކަލީގައި ހުންނަ ފޮލިކް އެސިޑް ފަދަ މާއްދާތަކަކީ ބަނޑުގައި އޮންނަ ދަރިފުޅުގެ ހަށިގަނޑުގައި ޢައިބު އުފެދުމުން މިންޖުކޮށްދޭނެ މާއްދާ އެކެވެ.

ލޭގެ ޕްރެޝަރު ދަށްކުރުން : ބްރޮކަލީގައި ކްރޯމިއަމް ކިޔާ މައުދަނެއް ހުރެއެވެ. މިއީ އިންސިއުލިންގެ މަސައްކަތް ހަރުދަނާކޮށްދީ، ލޭގައި ހަކުރުގެ މިންވަރު ކޮންޓްރޯލްކޮށްދީ، ލޭގެ ޕްރެޝަރު ހަމައަކަށް އެޅުވުމަށް އެހީތެރިވެދޭ މައުދަނެކެވެ. މީގެ އިތުރުން ބްރޮކަލީގައި ހިމެނޭ ތަފާތު ވިޓަމިންތަކާއި، ފައިބަރު، އަދި އޮމެގާ-3-ފެޓީ އެސިޑްތަކަކީ ވެސް މަތިވެފައިވާ ލޭގެ ޕްރެޝަރު ދަށްކުރުމަށް އެހީތެރިވެދޭ ބާވަތްތަކެކެވެ.

ލޭމަދުވުން : ބްރޮކަލީގައި ދަގަނޑު ގިނައިން ހުރުމަކީ ލޭމަދުވުން ފަދަ ހާލަތްތައް މެދުވެރިވެފައިވާ ފަރާތްތަކަށް ބްރޮކަލީ ބޭނުންކުރުން ފައިދާއަކަށް ވާނެ ކަމެކެވެ. މީގެ އިތުރުން ބްރޮކަލީގައި ކޮޕަރ ވެސް ހުރެއެވެ. މިއީ ވެސް ލޭގެ ރަތް ސެލްތައް އުފެއްދުމަށް ބޭނުންތެރި މައުދަނެކެވެ.

ދިފާއީ ބާރު ރަގަޅުކޮށްދިނުން : ބްރޮކަލީގައި ދިފާއީ ބާރު ވަރުގަދަކުރުމަށް އެހީތެރިވެދޭ ތަފާތު މާއްދާތައް އެކުލެވިފައި ވެއެވެ. އެގޮތުން ބްރޮކަލީގައި ހިމެނޭ މާއްދާތަކުގެ ތެރޭގައި ވިޓަމިން ސީ، ބީޓާ ކެރޮޓީން ފަދަ ވިޓަމިންގެ ބާވަތްތަކާއި، ސިލެނިއަމް، ކޮޕަރ، ޒިންކު، ފޮސްފަރަސް، ފަދަ މައުދަންތައް ހިމެނެއެވެ.

ލޮލުގެ ދުޅަހެޔޮކަން ދެމެހެއްޓުން : ބްރޮކަލީ އަކީ ލޮލުގެ ދުޅަހެޔޮކަމާއި ރައްކާތެރިކަމަށް ވެސް ވަރަށް ބޭނުންތެރި ބާވަތެކެވެ. ބްރޮކަލީގައި ހިމެނޭ ޒިއެޒެންތިން، ބީޓާ ކެރޮޓީން، ވިޓަމިން އޭ، ވިޓަމިން ސީ، ވިޓަމިން އީ، އަދި ފޮސްފަރަސް ފަދަ މާއްދާތަކަކީ ލޮލުގެ ދުޅަހެޔޮކަން ދެމެހެއްޓުމަށް އެހީތެރިވެދޭ މާއްދާ ތަކެކެވެ.

މައުލޫމާތު :

·         http://www.organicfacts.net/health-benefits/vegetable/health-benefits-of-broccoli.html

·         http://www.nutrition-and-you.com/broccoli.html