މާބަނޑު ދުވަސްވަރު : ފެންދުލި މާއަވަހަށް ފަޅައިގެންދިއުން

 

މާބަނޑު ދުވަސްވަރު : ފެންދުލި މާއަވަހަށް ފަޅައިގެންދިއުން

ފެންދުލި މާވައަހަށް ފަޅައިގެންދިއުން  (preterm premature rupture of membrane / PPROM)  މާނަކުރެވެނީ ވިހެއުމުގެ ވޭންވަރު އައުމުގެ ކުރިން ފެންދުލި ފަޅައިގެން ގޮސް ފެންފޭބުމަށެވެ. ނުވަތަ ފެން ލީކުވުމަށެވެ. ނުވަތަ ބަނޑަށް 37 ހަފްތާ ފުރުމުގެ ކުރިން ފެންދުލި ފަޅައިގެންދިއުމެވެ. ފެންދުލި މާއަވަހަށް ފަޅައިގެންދިއުމަކީ ފެންދުލިން ފެން ބޭރުވެ، ދުވަސްނުފުރާ ވިހެއުން ނޫނީ ދުވަސްނުފުރާ އުފަންވުން ކުރިމަތި ކުރުވާނެ ކަމެކެވެ. އަދި އިންފެކްޝަން އުފެދުމަށް މަގުފަހިވާނެ ކަމެކެވެ.

ދުވަސްފުރިފައި ވަނިކޮށް ވެސް ފެންދުލި ފަޅައިގެން ހިނގައިދާނެއެވެ. އަނެއްބައި ފަހަރު ދުވަސް ނުފުރެނީސް ވެސް ފެންދުލި ފަޅައިގެން ހިނގައިދާނެ އެވެ. ދުވަސް ނުފުރެނީސް ފެންދުލި ފަޅައިގެން ހިނގައްޖެނަމަ ދުވަސް ނުފުރާ ވިހާނެ އެވެ. މާބަނޑުވާ %10-8 މީހުންނަށް ފެންދުލި މާއަވަހަށް ފަޅައިގެން ދިއުމުގެ މައްސަލަ ކުރިމަތިވާކަން ފާހަގަ ކުރެވެއެވެ. ދުވަސްނުފުރާ ވިހެއުން 1/3 މީހުންނަށް ކުރިމަތިވަނީ ފެންދުލި މާއަވަހަށް ފަޅައިގެން ގޮސްކަން ފާހަގަ ކުރެވެއެވެ.

ސަބަބު

ފެންދުލި މާވައަހަށް ފަޅައިގެންދާ ސީދާ ސަބަބެއް އަދި ހޯދިފައެއް ނުވެއެވެ. ދުވަސްފުރި ވިހަން ކައިރިވުމުނ ފެންދުލި ފަޅައިގެންދަނީ ތަބީޢީ ގޮތުން ފެންދުލި ދެރަވުމުން، ނޫނީ ރަހިމުގެ ހަރަކާތާއެކު އަންނަ ބާރު ގެ ސަބަބުން ކަމަށްވުމަކީ އެކަށީގެންވާ ކަމެކެވެ. ދުވަސްފުރުމުގެ ކުރިން ފެންދުލި ފަޅައިގެންދާ މައިގަނޑު އެއް ސަބަބަކީ މައިމީހާގެ ރަހިމުގައި އިންފެކްޝަން އަށަގަތުމެވެ.

މަގުފަހިކުރާ ކަންތައްތައް

ފެންދުލި މާއަވަހަށް ފަޅައިގެންދިއުމަށް މަގުފަހިކުރާ ކަންތައްތަކުގެ ތެރޭގައި އަންނަނިވި ކަންތައްތައް ހިމެނެއެވެ.

·         ކުރީ ފަހަރަކު ބަލިވެއިން އިރު ދުވަސްނުފުރާ ވިހެއުން

·         މައިމީހާގެ ނަސްލު އުފައްދާ ނިޒާމުގައި އިންފެކްޝަން ހެދިފައި ހުރުން : މައިމީހާގެ ކިބައިގައި އިންފެކްޝަން ހުރުން (އެންމެ އާންމުކޮށް އިންފެކްޝަން އުފައްދަނީ އީކޮލައި އަދި ގުރޫޕް ބީ ސްޓްރެޕްޓޮކޯކަސް ގުރޫޕްގެ ބެކްޓީރިޔާތަކުން) ނޫނީ ދަރިފުޅުގެ ކިބައިގައި އިންފެކްޝަން ހުރުން ފަދަ ކަމަކުން ވެސް ފެންދުލި މާއަވަހަށް ފަޅައިގެން ދިއުމަށް މެދުވެރިވެދާނެ އެވެ.

·         މާބަނޑު ދުވަސްވަރު ކުރިމަތި ފަރާތުން ލޭފޭބުން : ޚާއްޞަކޮށް ފަހު 6 މަހުގައި މިގޮތަށް ލޭފޭބުމަކީ ފެންދުލި އަވަހަށް ފަޅައިގެން ދިއުމުގެ ހިރާސް އިތުރުކުރާ ކަމެކެވެ.

·         މައިމީހާގެ ކިބައިގައި ހުންނަ ނޭދެވޭ އާދަތައް : މިސާލަކަށް މާބަނޑު ދުވަސްވަރު ދުންފަތުގެ އިސްތިއުމާލުކުރުން ނުވަތަ މަސްތުވާ ތަކެތި ބޭނުންކުރުމަކީ ފެންދުލި މާއަވަހަށް ފަޅައިގެންދިއުމަށް މަގުފަހިވެދާނެ ކަމެކެވެ.

·         ދިރިއުޅުމުގެ ފެންވަރު ދަށްވުން : މިފަދަ މީހުންނަށް ގިނަ ފަހަރު އެކަށޭނަ ޞިއްޙީ ފަރުވާ މާބަނޑު ދުވަސްވަރު ނުލިބެއެވެ. ނޫނީ ނުހޯދައެވެ. އޭގެ ސަބަބުން ތަފާތު މައްސަލަތަކަށް މަގުފަހިކުރެއެވެ.

·         ޖިންސީގުޅުމުން އަރާ ބައްޔެއް ޖެހުން : މިސާލަކަށް ޖިންސީގުޅުމުން ފެތުރޭ ބަލިތައް ކަމުގައިވާ ކްލަމީޑިޔާ އިންފެކްޝަން އަދި ކިހުނުވުން ފަދަ އިންފެކްޝަންތަކުގެ ސަބަބުން ފެންދުލި މާއަވަހަށް ފަޅައިގެންދިއުން މެދުވެރިވުމަކީ އެކަށީގްންވާ ކަމެކެވެ.

·         ރަހިމު ފުޅާވުން : ފެންދުލީގައި ފެންގިނަވުން، ނުވަތަ އެއްފަހަރާ  އެއްކުއްޖަކަށްވުރެ ގިނަ ކުދިންނަށް ބަލިވެއިނުމުގެ ސަބަބުން ރަހިމު މާބޮޑަށް ފުޅާވެ، ފުފުމަކީ ފަހަރުގައި މާއަވަހަށް ފެންދުލި ފަޅައިގެން ދިއުމަށް މަގުފަހިކޮށްފާނެ ކަމެކެވެ.

އަލާމާތްތައް

ބަލިވެއިނދެ ކޮންމެ ފަހަރަކު ފެންދުލި މާއަވަހަށް ފަޅައިގެންދިއުމުން ފެންނަ އަލާމާތްތައް އެކި ފަހަރު ތަފާތުވުމަކީ އެކަށީގެންވާ ކަމެކެވެ. އާންމުކޮށް ފެނިދާނެ އަލާމާތްތައް ތިރީގައި މިވަނީ އެވެ.

·         ކުރިމަތި ފަރާތުން ކުއްލިއަކަށް ދިޔައެއް ނޫނީ ފެން ފޭބުން

·         ޖިންސީ ގުނަވަނުން ހަޑިއެއްޗެހި އައުން

·         ކުރިމަތި ފަރާތުގައި ނޫނީ ޖަގިޔަލުގައި ތެތްކަން އިހުސާސްވުން

ނުރައްކާތައް

ދުވަސްނުފުރާ އުފަންވާ ނޫނީ ވިހާ ހާލަތްތަކުގައި މާއަވަހަށް ފެންދުލި ފަޅައިގެންދިއުމަކީ އާންމު ކަމެކެވެ. ނޫނީ ނުވެ ނުދާނެ ކަމެކެވެ. އެހެންކަމުން ދުވަސްނުފުރާ އުފަންވާ ކުއްޖަކަށް ދިމާވެދާނެ ހުރިހާ ނުރައްކާތަކެއް ކަހަލަ ގޮތަކަށް މާއަވަހަށް ފެންދުލި ފަޅައިގެން ދިއުމުން ވެސް ކުރިމަތިވުމަކީ ގާތްގަކަމެކެވެ. ކުރުގޮތަކަށް ބުނާނަމަ މާއަވަހަށް ފެންދުލި ފަޅައިގެންދިއުމުން ދިމާވާނެ އެންމެ ބޮޑު ނުރައްކަލަކީ ދުވަސްނުފުރާ އުފަންވުން ނުވަތަ ދުވަސްނުފުރާ ވިހެއުމެވެ.

ދުވަސްނުފުރާ އުފަންވުމުން ދިމާވެދާނެ ނުރައްކާތައް

ދުވަސްނުފުރާ އުފަންވުމަކީ ތަފާތު ނުރައްކާތައް ތުއްތު ދަރިފުޅަށް ކުރިމަތިކުރުވާނެ ކަމެކެވެ. އެގޮތުން ކުރު މުއްދަތަކަށް ކުރިމަތިވާ ނުރައްކާތަކާއި ދިގުމުއްދަތަކަށް ކުރިމަތިވާ ނުރައްކާތައް ހުރެއެވެ. އާންމު ގޮތެއްގައި ދުވަސްނުފުރާ ވިހެއުން އަވަސްވި (ބަނޑަށް ކުރީކޮޅު (ވިހެއުމާއި ކައިރި ނުވަނީސް ނޫނީ ދުވަސްފުރެން ކައިރި ނުވަނީސް) ދުވަސްނުފުރާ ވިހެއުން) ވަރަކަށް ނުރައްކާތައް ކުރިމަތިވުމުގެ ހިރާސް އިތުރުވާނެއެވެ. މީގެ އިތުރުން ނުރައްކާތައް ކުރިމަތިވުން މެދުވެރިވުމުގައި ކުއްޖާގެ ބަރުދަން ވެސް ދައުރެއް އަދާކުރެއެވެ.

ކުރުމުއްދަތަކަށް ދިމާވާ ނުރައްކާތައް

ދުވަސްނުފުރާ އުފަންވުމަށް ފަހު ފުރަތަމަ ދެތިން ހަފްތާގެ ތެރޭގައި އަންނަނިވި ނުރައްކާތައް ކުރިމަތިވުމަކީ އެކަށީގެންވާ ކަމެކެވެ.

·         ނޭވާލުމުގެ މައްސަލަތައް : މިސާލަކަށް ރެސްޕިރޭޓަރީ ޑިސްޓްރެސް ސިންޑްރޯމް ކުރިމަތިވުން

·         ހިތުގެ މައްސަލަތައް : މިސާލަކަށް ޕޭޓަންޓް ޑަކްޓަސް އާޓަރިއޯސަސް ކުރިމަތިވުން

·         ސިކުނޑިއަށް ދިމާވާ މައްސަލަތައް : މިސާލަކަށް އިންޓްރަވެންޓްރިކިއުލަރ ހިމޮރޭޖް ވުން

·         ފިނިހޫނުމިން ހިފެހެއްޓުމުގައި ދިމާވާ މައްސަލަތައް : މިސާލަކަށް ހައިޕޯތާމިއާ ކުރިމަތިވުން

·         ހަޖަމުކުރާ ނިޒާމްގެ މައްސަލަތައް : މިސާލަކަށް ނެކްރޮޓައިޒިންގ އެންޓީރޯކޮލައިޓިސް ކުރިމަތިވުން

·         ލޭގެ މައްސަލަތައް : މިސާލަކަށް ލޭމަދުވުން ، ރީނދޫވުން

·         މެޓަބޮލިޒަމްގެ މައްސަލަތައް : މިސާލަކަށް ހަކުރު ދަށްވުން

·         ދިފާއީ ނިޒާމުގެ މައްސަލަތައް : މިސާލަކަށް ސްޕްސިސް ވުން

·         ލޮލުގެ މައްސަލަތައް : މިސާލަކަށް ރެޓިނޮޕަތީ އޮފް ޕްރިމެޗުރިޓީ ކުރިމަތިވުން

ދިގުމުއްދަތަކަށް ދިމާވާ ނުރައްކާތައް

ދުވަސްނުފުރާ އުފަންވާ ކުދިންނަށް ދިގުމުއްދަތަކަށް ދެމިގެންދާ ގޮތަށް ދިމާވެދާނެ މައްސަލަތަކުގެ ތެރޭގައި އަންނަނިވި ކަންތައްތައް ހިމެނެއެވެ.

·         ސެރެބްރަލް ޕަލްސީ ކުރިމަތިވުން

·         އުގެނުމުގެ ނުކުޅެދުންތެރިކަން ކުރިމަތިވުން

·         އަޑުއިވުމުގެ މައްސަލަތައް

·         ފެނުމުގެ މައްސަލަތައް

·         ދަތުގެ މައްސަލަތައް

·         އުޅުމާއި ނަފްސާނީ މައްސަލަތައް

·         ދާޢިމީ ޞިއްޙީ މައްސަލަތައް

 

މާއަވަހަށް ފެންދުލި ފަޅައިގެންދިއުމުން ދިމާވާ ނުރައްކާތައް

·         އެމްނީއޯޓިކް ފެނުގައި އިންފެކްޝަން ހެދުން ނުވަތަ ކޮރިއޯއެމްނިއޮނައިޓިސް

·         ރަހިމުން މަސްވަކިވުން

·         ފޫޅުދަނޑީގައި ހުންނަ މައްސަލަތައް : މިސާލަކަށް ފޫޅުދަނޑި ގޮށްޖެހި ފިތުން

·         ތުއްތު ދަރިފުޅު އޮންނަށްޖެހޭ ގޮތް ނޫން އެހެންގޮތަކަށް އޮތުން : މިސާލަކަށް ފައިކޮޅު ތިރިއަށް އޮތުން

·         ސިޒޭރިއަން ހަދަންޖެހުން

·         ވިހެއުމަށް ފަހު ވެސް ކުރިމަތި ފަރާތުގައި އިންފެކްޝަން އަށަގަތުން

·         ތުއްތު ދަރިފުޅަށް ނޭވާލާން އުދަނގޫވެ "ރެސްޕިރޭޓަރީ ޑިސްޓްރެސް ސިންޑްރޯމް" ކުރިމަތިވުން

·         ތުއްތު ދަރިފުޅުގެ ފުއްޕާމޭ ފުރިހަމަނުވުން

·         ތުއްތު ދަރިފުޅުގެ ސިކުނޑިއަށް ލޭއެޅުން

·         ވިހެއުމުގެ ތެރޭގައި ތުއްތު ދަރިފުޅު މަރުވުން

 

ދެނެގަތުން

މާއަވަހަށް ފެންދުލި ފަޅައިގެންދިއުން ދެނެގަތުމުގެ ގޮތުން މާބަނޑުމީހާ އާއި ސުވާލުކޮށް ގުޅުންހުރި ތަފާތު މައުލޫމާތުތައް އަހައި އޮޅުން ފިލުވާނެއެވެ. އެއަށްފަހު އަންނަނިވި ކަންތައްތައް ކުރުމާއި، ޓެސްޓުތައް ހެދުމަކީ އެކަށީގެންވާ ކަމެކެވެ.

(ހ) ސްޕެކިޔުލަމް އެގްޒަމިނޭޝަން : މިޓެސްޓުގައި ސްޕެކިޔުލަމް އެއްގެ އެހީގައި ކުރިމަތި ފަރާތް ނުވަތަ ޖިންސީ ގުނަވަން ޗެކުކޮށް ހަދާނެއެވެ. އެގޮތުން ރަހިމުގެ ދޮރު ފުޅާވެފައި ހުރި މިންވަރު ބަލާނެއެވެ. މީގެ އިތުރުން ރަހިމުގެ ދޮރުން ފެން ފައިބައިތޯ ވެސް ބަލާނެއެވެ. ފެންދުލި ފަޅައިގެން ގޮސްފައިވާނަމަ ރަހިމުގެ ދޮރުން ފެންފައިބާނެއެވެ. ޓެސްޓު ހެދުމަށްޓަކައި ފެން ކޮޅެއް ނެގުމަކީ ވެސް އެކަށީގެންވާ ކަމެކެވެ. ވިހަން ކައިރިނުވާނަމަ އިގިލި ލައްވައިގެން ޕެލްވިކް އެގްޒާމް މާގިނައިން ހެދުމަކީ ރަނގަޅު ކަމެއް ނޫނެވެ. ސަބަބަކީ މިގޮތަށް ބަލައި ހެދުމުން ބައެއް ފަހަރު އިންފެކްޝަން އުފެދުމަށް މަގުފަހިވާތީ އެވެ.

(ށ) ޕީއެޗް (އެސިޑް-ބޭސް) ބެލެންސް ޓެސްޓިންގ : އެމްނީއޯޓިކް ފެނުގެ ޕީއެޗް ބެލެންސް ، ކުޑަކަމުނަޖިސް އަދި ޖިންސީ ގުނަވަނުން އަންނަ ދިޔައިގެ ޕީއެޗް ބެލެންސް އާއި ތަފާތުވާނެއެވެ. ޕީއެޗް ބެލެންސް ބަލަނީ ނެގުނު އެމްނީއޯޓިކް ފެންކޮޅު އެކަމަށް ޚާއްޞަ "ސްޓްރިޕް"(strip) އެއްގެ މައްޗަށް އަޅައި ބަލައި ހަދައިގެންނެވެ.

(ނ) މައިކްރޮސްކޯޕުން ބަލައިހެދުން : ނެގުނު އެމްނީއޯޓިކް ފެނުގެ ސާމްޕަލް މައިކްރޮސްކޯޕްގެ އެހީގައި ބަލައިހެދޭނެ އެވެ. އެގޮތުން ހިކިފައިވާ އެމްނީއޯޓިކް ފެންކޮޅު މައިކްރޮސްކޯޕް ގެ ދަށުން ބެލުމުން ފެންނާނީ "ފާރން"(fern-like) އެއްގެ ސިފަޔަށެވެ.

(ރ) އަލްޓްރާ ސައުންޑް ސްކޭން ހެދުން : ސްކޭންގެ އެހީގައި ފެންދުލީގައި ފެންހުރި މިންވަރު ދެނެގަނެވޭނެ އެވެ. ފެންދުލީގައި ފެންމަދު ނަމަ ފަހަރުގައި ފެންދުލި ފަޅައިގެން ގޮސް ފެން ލީކުވުމުން މަދުވެފައި ހުރިކަމަށް ވުމަކި އެކަށީގެންވާ ކަމެކެވެ. މީގެ އިތުރުން އަލްޓްރާ ސައުންޑް ސްކޭންގެ އެހީގައި ތުއްތު ދަރިފުޅުގެ ގުނަވަންތައް ހުރިނެތްގޮތް ވެސް ދެނެގަނެވޭނެ އެވެ.  

(ބ) އެމްނީއޯސިންޓީސިސް ހެދުން : މިއީ ސްކޭންގެ އެހީގައި ފެން ދުއްޔަށް ކައްޓެއް ހަރައިގެން އެކަށީގެ އެހީގައި އިންޑިގޯ ކާރމައިން ޑައި ފޮނުވައިގެން ބެލުމެވެ. ޑައި އެގޮތަށް އެމްނީއޯޓިކް ފެނަށް ފޮނުވުމަށް އަންނަ ފެން ޕެޑުގައި ނޫކުލައިގައި ހުރިނަމަ އޭގެ މާނައަކީ ފެންދުލި ފަޅައިގެން ގޮސްފައިވުމެވެ.

(ޅ) ކުއްޖާ ރަހިމުގައި އޮތްގޮތް ނުވަތަ ޕޮޒިޝަން ބެލުން : މިއީ ވެސް މިފަދަ ހާލަތުގައި ވަރަށް މުހިއްމު ކަމެކެވެ.

އަންނަނިވި ކަންތައްތަކުގެ ތެރެއިން ކަމެއް ފާހަގަކުރެވޭނަމަ ފެންދުލި ފަޅައިގެން ގޮސްފައިވުމަކީ އެކަށީގެންވާ ކަމެކެވެ.

·         ރަހިމުގެ ދޮރުން އެމްނީއޯޓިކް ފެން ލީކުވުން

·         ކުރިމަތި ފަރާތުން ހަޑިއެއްޗެހި އައުން

ފަރުވާ

މާވަހައަށް ފެންދުލި ފަޅައިގެންދިއުމުން ދެވޭ ފަރުވާ ބިނާވަނީ އަންނަނިވި ކަންތައްތަކުގެ މައްޗަށެވެ.

·         މާބަނޑު ދުވަސްވަރު ކަންތައްތައް ހުރިނެތްގޮތް، ބަނޑަށްވީ ދުވަސް / މައިމީހާގެ ކުރީގެ ޞިއްޙީ ހާލަތު / މައިމީހާގެ އާންމު ދުޅަހެޔޮކަން

·         ކުރިމަތިވެފައިވާ ހާލަތުގެ ނުރައްކާތެރިކަން

·         ވަކި ޚާއްޞަ ބޭހަކަށް، ފަރުވާއަކަށް ނޫނީ އިޖުރާއާތަކަށް ތަހައްމަލުކުރެވޭނެ މިންވަރު

·         ކުރިމަތިވެފައިވާ އުދަނގޫތައް

ހަސްފަތާލުގައި އެދުމަތިކުރުން އަދި ބެޑްރެސްޓުކުރުން

ފެންދުލި މާއަވަހަށް ފަޅައިގެން ގޮސްފިނަމަ، ހަސްފަތާލުގައި އެދުމަތިކޮށް މައިމީހާގެ ހާލަތު ކައިރިން ބަލަމުން ގެންދާނެ އެވެ. އެގޮތުން މައިގަނޑު ގޮތެއްގައި ބަލާނެ ކަންތައްތަކުގެ ތެރޭގައި އަންނަނިވި ކަންތައްތައް ހިމެނެއެވެ.

·         ވިހެއުމުގެ ނިޝާންތައް ، ރަހިމުގެ ހަރަކާތްތައް

·         ދަރިފުޅުގެ ތޮޅުން، ހަރަކާތް، ހިތުގެ ވިންދު ، އެހެނިހެން ކަންތައްތައް

·         އިންފެކްޝަންގެ އަލާމާތްތައް : ހުންއައުން، ބަނޑުގައި ރިހުން، ތުއްތު ދަރިފުޅުގެ ހިތުގެ ވިންދު އަވަސްވުން

ބޭސް ބޭނުންކުރުން

ފެންދުލި މާވަހައަށް ފަޅައިގެން ގޮސްފިނަމަ ފަހަރުގައި ތިރީގައިވާ ބޭސްތައް ބޭނުންކުރަން ޖެހުމަކީ ނޫނީ ބޭނުން ކުރުމަށް ލަފާދިނުމަކީ އެކަށީގެންވާ ކަމެކެވެ.

·         ކޯޓިކޯސްޓީރޮއިޑް : މިއީ ތުއްތު ދަރިފުޅުގެ ފުއްޕާމެ ހެދިބޮޑުވެ ފުރިހަމަވުމަށް އެހީތެރިވުމަށްދޭ ބޭހެކެވެ. ދުވަސް ނުފުރާ އުފަންވެއްޖެނަމަ ތުއްތު ދަރިފުޅުގެ ފުއްޕާމޭ ފުރިހަމަނުވެ ހުންނާތީ، އެކަށޭނަ ގޮތުގައި މަސައްކަތް ނުކުރެވުމަކީ އެކަށީގެންވާ ކަމެކެވެ.

·         އެންޓިބަޔޮޓިކް : މިއީ އިންފެކްޝަނަށް ފަރުވާ ކުރުމަށް ނޫނީ އިންފެކްޝަން އިން ރައްކާތެރިވުމަށް ދީފާނެ ބޭހެކެވެ.

·         ޓޮކޯލިޓިކްސް : މިއީ ދުވަސްނުފުރާ ވިހެއުމުން ރައްކާތެރިކޮށް ދިނުމަށް ދީއުޅޭ ބޭހެކެވެ.

ވިއްސުން

ފެންދުލި މާއަވަހަށް ފަޅައިގެން ގޮސްފިނަމަ ފަހަރުގައި ވީއެންމެ އަވަހަކަށް ވިއްސުވުމަކީ ވެސް ކުރަންޖެހިދާނެ ކަމެކެވެ. އާންމު ގޮތެއްގައި ބަނޑަށް އެންމެ މަދުވެގެން 34 ހަފްތާ ނުވަނީސް ވިއްސުވުމަށް މަސައްކަތެއް ނުކުރާނެއެވެ. އެއަށްވުރެ އަވަސް ނަމަ ފަހަރުގައި ވަކި މުއްދަތެއް ބެލުމަށްފަހު ސިޒޭރިއަން ހަދައިގެން ދަރިފުޅު ނަގަން ވެސް ޖެހިދާނެ އެވެ. ރަހިމުން މަސްވަކިވުން، އެމްނީއޯޓިކް ފެނުގައި އިންފެކްޝަން ހެދުން އަދި ތުއްތު ދަރިފުޅަށް މައްސަލައެއް ދިމާވަކަމަށް ފާހަގަކުރެވޭނަމަ ބަނޑަށް 34 ހަފްތާ ފުރިހަމަ ނުވަނީސް ވެސް ވިއްސަން ނޫނީ ސިޒޭރިއަން ހަދައިގެން ދަރިފުޅު ނަގަންޖެހިދާނެއެވެ.

ބަނޑަށްވީ ދުވަހަށް ބަލައި ފަރުވާ ކުރިޔަށް ގެންދިއުން

އެހެން ނަޒަރަކުން ފަރުވާއަށް ރިޢާޔަތްކުރާއިރު، ބަނޑަށް ވީ ދުވަހަކަށް ބަލައި ފަރުވާ ކުރިޔަށްގެންދިއުމުގައި އަމަލުކުރެވޭގޮތް ތިރީގައި މިވަނީ އެވެ.

ބަނޑަށް 37 ހަފްތާ ފުރުމަށްފަހު ފެންދުލި ފަޅައިގެންދިއުން

ބަނޑަށް 37 ހަފްތާ ފުރިހަމަ ވެފައިވާނަމަ އޭގެ މާނައަކީ ދުވަސް ފުރިފައިވުމެވެ. އަދި ވިހަން ތައްޔާރުވެފައިވުމެވެ. މިހާލަތުގައި ފެންދުލި ފަޅައިގެން ހިނގައްޖެނަމަ ލަސްނުކޮށް ވިހެއުމަށް ހަސްފަތާލަން ދާންޖެހޭނެ އެވެ. ލަސްކޮށްފިނަމަ ފަހަރުގައި އިންފެކްޝަން އުފެދުމަކީ އެކަށީގެންވާ ކަމެކެވެ. މިހާލަތުގައި ފުރަތަމަ ތަބީޢީ ގޮތުން ވިހައިތޯ ބަލަން މަޑުކޮށްދާނެ އެވެ. އަދި އެއަށްފަހު ވިހެއުމަށް ބާރުއަޅާ ބޭހެއް ދީގެން ވިއްސުވުމަށް މަސައްކަތްކުރާނެއެވެ.

ބަނޑަށް 37-34 ހަފްތާއާއި ދެމެދު ފެންދުލި ފަޅައިގެންދިއުން

މިމުއްދަތުގައި ފެންދުލި ފަޅައިގެން ހިނގައްޖެނަމަ ވިއްސުވުމަށް މަސައްކަތްކުރާނެއެވެ. ސަބަބަކީ ލަސްކޮށްފިނަމަ އިންފެކްޝަން އުފެދި، އިތުރު މައްސަލަތައް ދިމާވުމުގެ ފުރުޞަތު އިތުރުވެދާނެތީ އެވެ.

ބަނޑަށް 34 ހަފްތާ ހަމަވުމުގެ ކުރިން ފެންދުލި ފަޅައިގެންދިއުން

ބަނޑަށް 34 ހަފްތާ ހަމަވުމުގެ ކުރިން ފެންދުލި ފަޅައިގެން ދިއުމަކީ މާ ނުރައްކާތެރި ކަމެކެވެ. މިހާލަތުގައި އިންފެކްޝަން ގެ އަސަރެއް ނެތްތަނަމަ ބެޑްރެސްޓް ކުރުމަށް ލަފާދޭނެ އެވެ. ފުއްޕާމޭ ފުރިހަމަކުރުމަށް ސްޓީރޮއިޑް ވެސް ދޭނެއެވެ. އިންފެކްޝަން އިން ރައްކާތެރިކުރުމަށް އެންޓިބަޔޮޓިކް ވެސް ދޭނެއެވެ. ހަސްފަތާލުގައި ބާއްވައިގެން މައިމީހާއާއި ދަރިފުޅުގެ ހާލަތު ގާތުން މޮނީޓަރ ކުރަމުން ގެންދާނެ އެވެ. ފުއްޕާމޭގެ ހެދިބޮޑުވުން ބަލަމުން ގޮސް، އެކަށޭނަ ވަރަށް ފުއްޕާމޭ ފުރިހަމަވުމުން، ވިއްސުވާނެ އެވެ.

ނޯޓް : މިއީ މައުލޫމާތު ފެތުރުމުގެ ނިޔަތުގައި ލިޔެފައިވާ ލިޔުމެކެވެ.

ހަވާލާ

·         https://www.stanfordchildrens.org/en/topic/default?id=premature-rupture-of-membranes-prompreterm-premature-rupture-of-membranes-pprom-90-P02496  

·         https://www.mayoclinic.org/healthy-lifestyle/labor-and-delivery/in-depth/water-breaking/art-20044142#

·         https://www.msdmanuals.com/professional/gynecology-and-obstetrics/abnormalities-and-complications-of-labor-and-delivery/prelabor-rupture-of-membranes-prom

·         https://www.chop.edu/conditions-diseases/premature-rupture-membranes-prompreterm-premature-rupture-membranes-pprom#:~:text=Premature%20rupture%20of%20membranes%20(PROM)%20is%20a%20rupture%20(breaking,10%20percent%20of%20all%20pregnancies.

·         https://www.aafp.org/pubs/afp/issues/2006/0215/p659.html

·         https://medlineplus.gov/ency/patientinstructions/000512.htm   

މާބަނޑު ދުވަސްވަރު : އުފަންވާއިރު ބަރުދަން ލުއިވުން

                                          މާބަނޑު ދުވަސްވަރު : އުފަންވާއިރު ބަރުދަން ލުއިވުން

އުފަންވާއިރު ބަރުދަން ލުއިވުން(low birth weight)  މާނަކުރެވެނީ އުފަންވާއިރު ބަރުދަން 2.5 ކިލޯގްރާމް އަށްވުރެ ލުއިވުމަށެވެ.  އާންމު ގޮތެއްގައި ތުއްތު ކުއްޖަކު އުފަންވާއިރު ބަރުދަނުގައި އެވްރެޖްކޮށް 3.5 ކިލޯ ވަރު ހުންނާނެ އެވެ. އުފަންވާއިރު ބަރުދަން ލުއިވުމުން ތުއްތު ދަރިފުޅު ނިސްބަތުން ކުޑަޔަސް، އެއީ އެހެން މައްސަލައެއް ނެތް، ދުޅަހެޔޮ ކުއްޖަކަށްވުމަކީ ގާތް ކަމެކެވެ. ނަމަވެސް އުފަންވާއިރު ބަރުދަން ލުއިވުމަކީ ނުރައްކާތެރި ޞިއްޙީ މައްސަލަތައް މެދުވެރި ކުރުވައިފާނެ ކަމެކެވެ.

ސަބަބު

އުފަންވާއިރު ބަރުދަން ލުއިވާ އެންމެ

އާންމު ސަބަބަކީ ދުވަސްނުފުރާ އުފަންވުމެވެ. ދުވަސް ނުފުރާ އުފަންވާ ކުދިން (ހެދިބޮޑުވެ، ބަރުދަން ޖެއްސުމަށް) ރަހިމުގައި ހޭދަކުރާ މުއްދަތު ނިސްބަތުން ކުޑަވާނެއެވެ. އާންމު ގޮތެއްގައި ކުއްޖާގެ ބަރުދަނުގެ ބޮޑުބައެއް އިތުރުވެގެން އަންނަނީ މާބަނޑު ދުވަސްވަރުގެ ފަހު ދެތިން ހަފްތާގެ ތެރޭގައެވެ.

އުފަންވާއިރު ބަރުދަން ލުއިވާ އަނެއް ސަބަބަކީ ރަހިމުގެ ތެރޭގައި ތުއްތު ދަރިފުޅު ހެދިބޮޑުވުން ހުއްޓުން ނުވަތަ ލަސްވުމެވެ. މިއީ މާބަނޑު ދުވަސްވަރު ތުއްތު ދަރިފުޅު ރަނގަޅަށް ހެދިބޮޑުނުވާތީ ދިމާވާ ކަމެކެވެ. މިއީ ފަހަރުގައި މަހުގައި ނޫނީ މަންމަގެ ކިބައިގައި ނޫނީ ތުއްތު ދަރިފުޅުގެ ކިބައިގައި ހުރި ކަމަކުން ކުރިމަތިވާ ކަމަކަށް ވުމަކީ ގާތް ކަމެކެވެ.

ރަހިމުގެ ތެރޭގައި ހެދިބޮޑުވުން ހުއްޓޭ ކުއްޖަކު :

·         ދުވަސްފުރާ އުފަންވުން : މީގެ މާނައަކީ ބަނޑަށް 41-37 ހަފްތާއާއި ދެމެދު އުފަންވުމެވެ. ތުއްތު ދަރިފުޅު ކުޑަވި ނަމަވެސް ޖިސްމާނީ ގޮތުން ކުއްޖާ އޮންނާނީ ފުރާ ފުރިހަމަވެފައެވެ.

·         ދުވަސްނުފުރާ އުފަންވުން : ތުއްތު ދަރިފުޅު ކުޑަވެފައި، ޖިސްމާނީ ގޮތުން މުޅިން ފުރިހަމައެއް ނުވާނެއެވެ.

މަގުފަހިކުރާ ކަންތައްތައް

އުފަންވާއިރު ބަރުދަން ލުއިވުމަށް މަގުފަހިކުރާ ކަންތައްތަކުގެ ތެރޭގައި އަންނަނިވި ކަންތައްތައް ހިމެނެއެވެ.

·         މާބަނޑު ދުވަސްވަރު މައިމީހާގެ ކިބައިގައި އިންފެކްޝަން އަށަގަތުން

·         މާބަނޑު ދުވަސްވަރު މައިމީހާގެ ބަރުދަން އެކަށޭނަ ގޮތެއްގައި އިތުރުނުވުން

·         ކުރިން އުފަންވިއިރު ބަރުދަން ލުއިކުއްޖަކު ލިބިފައިވުން

·         ދުންފަތުގެ އިސްތިއުމާލުކުރުން

·         ބަނގުރާ ބުއިން

·         މަސްތުވާތަކެތި ބޭނުންކުރުން

·         މައިމީހާގެ އުމުރުން 15 ނޫނީ 17 އަހަރަށްވުރެ ހަނގުވުން ނޫނީ 35 އަހަރަށްވުރެ ދޮށިވުން

·         ކަޅު ނަސްލަށް ނިސްބަތްވުން

·         އެއްކުއްޖަކަށްވުރެ ގިނަ ކުދިންނަށް އެއްފަހަރާ ބަލިވެއިނުން

·         މާބަނޑު ދުވަސްވަރު ރަނގަޅުކާނާ ބޭނުން ނުކުރުން

·         މާބަނޑު ދުވަސްވަރު އެކަށޭނަ ޞިއްހީ ފަރުވާ ނުހޯދުން ނޫނީ ނުލިބުން

·         މާބަނޑު ދުވަސްވަރު ތަފާތު ޞިއްޙީ މައްސަލަތައް ފެންމަތިވުން

އަލާމާތްތައް

·         ތުއްތު ދަރިފުޅު އުފަންވިއިރު ބަރުދަން ލުއިވުން

·         ތުއްތު ދަރިފުޅުގެ އުމުރާއި އަޅާބަލާއިރު ސައިޒުން ކުޑަވުން

·         ތުއްތު ދަރިފުޅުގެ ހަށިގަނޑާއި އަޅާބަލާއިރު ނިސްބަތުން ބޯބޮޑުވުން

·         ހަށިގަނޑުގައި ސަރުބީ މަދުވުމުން ހަށިގަނޑު ހިކި އަނަރޫފަވެ، ނިކަމެތިހެން ހީވުން

ނުރައްކާތައް

އުފަންވާއިރު ބަރުދަން ލުއި ކުދިންނަށް އާންމު ގޮތެއްގައި މައްސަލަތަކާ ދިމާވެއެވެ. ދުވަސްފުރައި އެކަށޭނަ ބަރުދަނެއް ހުރެ އުފަންވާ ކުދިން ވަރަށް ދުވަސް ނުފުރައި، ބަރުދަން ލުއިކޮށް އުފަންވާ ކުދިންގެ ހަށިގަނޑުގެ ވަރުގަދަ އެއް ނުވާނެއެވެ. ކެއުން، ބަރުދަން އިތުރުކުރުން އަދި އިންފެކްޝަންތަކުން ރައްކާތެރިވުމުގައި ހުރަސްތަކާ ، ނޫނީ ދަތި އުދަނގޫތަކާ މިފަދަ ކުދިން ( އުފަންވާއިރު ބަރުދަން ލުއި ކުދިން) ކުރިމަތިލާން ޖެހެއެވެ. ހަމަމިގޮތަށް މިފަދަ ކުދިންގެ ހަށިގަނޑުގައި އެކަށޭނަ ވަރަށް ސަރުބީ ނުހުންނާތީ ހަށިގަނޑުގެ ފިނިހޫނުމިން އެއްވަރެއްގައި ހިފެހެއްޓުމަށް ވެސް އުދަނގޫވެއެވެ.

އުފަންވާއިރު ބަރުދަން ލުއި ކުދިންނަށް ވެސް ތަފާތު ނުރައްކާތައް ކުރިމަތި ވެއެވެ. އެއީ ދުވަސްނުފުރާ އުފަންވުމުން ނޫނީ އުފަންވިއިރު މާ ކުޑަވުމުން ދިމާވާ ނުރައްކާތަކެއްކަން ބުނެދޭން ބައެއް ފަހަރު އުދަނގޫވެއެވެ. އާންމު ގޮތެއްގައި އުފަންވިއިރު ބަރުދަން ލުއި ކުދިންނަށް ތަފާތު ނުރައްކާތައް ކުރިމަތިވުމުގެ ހިރާސް އޮވެއެވެ.

އާންމުކޮށް އުފަންވާއިރު ބަރުދަން ލުއި ކުދިންނަށް ދިމާވެދާނެ މައްސަލަތަކުގެ ތެރޭގައި އަންނަނިވި ކަންތައްތައް ހިމެނެ އެވެ.

·         އުފަންވާއިރު އޮކްސިޖަންގެ މިންވަރު ދަށްވުން

·         ހަށިގަނޑުގެ ފިނިހޫނުމިން އެކަށޭނަ ވަރެއްގައި ހިފަހައްޓަން އުދަނގޫވުން

·         ބަރުދަން އިތުރުކުރުމާއި، ކެއިންބުއިމުގައި ހުރަސްތަކާ ކުރިމަތިވުން

·         އިންފެކްޝަންތަކަށް ހުށަހެޅުމުގެ ހިރާސް އިތުރުވުން

·         ނޭވާލުމުގެ މައްސަލަތައް

·         ފުއްޕާމޭ ރަނގަޅަށް ފުރިހަމަނުވުން

·         ސިކުނޑިއަށް ލޭއެޅުން

·         ނިކޮރޮޓައިޒިން އެންޓީރޯކޮލައިޓިސް ކިޔާ ގޮހޮރު ދުޅަވުމުގެ ވައްތަރެއް ކުރިމަތިވުން

·         ކުއްލިއަކަށް ގޮތްނޭނގޭ ގޮތެއްގައި ތުއްތު ދަރިފުޅު މަރުވުން

މީގެ އިތުރުން އުފަންވާއިރު ބަރުދަން ލުއި ކުދިންނަށް ދާއިމީކޮށް ދެމިހުންނަ ނޫނޫ ހުރެދާނެ ނުރައްކާތައް ވެސް ކުރިމަތިވެއެވެ. އެފަދަ ނުރައްކާތަކުގެ ތެރޭގައި އަންނަނިވި ކަންތައްތައް ހިމެނެއެވެ.

·         ސެރެބްރަލް ޕަލްސީ

·         ލޯއަނދިރިވުން

·         ބީރުވުން

·         ހެދިބޮޑޫވުން ލަސްވުން

ދެނެގަތުން

މާބަނޑު ދުވަސްވަރު ގަވާޢިދުން ޑޮކްޓަރަށް ދައްކައި، ބަލަމުން ގެންދިއުމުގެ މައިގަނޑު އެއް ބޭނުމަކީ ތުއްތު ދަރިފުޅު ރަނގަޅަށް ހެދިބޮޑުވަމުންދޭތޯ ބެލުމެވެ. މާބަނޑު ދުވަސްވަރު ތުއްތު ދަރިފުޅުގެ ސައިޒު ނުވަތަ ބޮޑުމިން އެކި ގޮތްގޮތަށް ބަލައި ހެދެއެވެ. އެގޮތުން ތުއްތު ދަރިފުޅުގެ ހެދިބޮޑުވުން ބެލޭ ބައެއް ގޮތްތައް ތިރީގައި މިވަނީ އެވެ.

(ހ) މައިމީހާގެ ބަރުދަން ބެލުން:  މައިމީހާ އެކަށޭނަ ވަރަށް ބަރުދަން އިތުރުވޭތޯ ބެލުމަކީ ތުއްތު ދަރިފުޅުގެ ހެދިބޮޑުވުން ބެލުމަށް ބޭނުންކުރެވިދާނެ ގޮތެކެވެ.

(ށ) ފަންޑަސްގެ ދިގުމުން ބެލުން : ފަންޑަސް ގެ ދިގުމިން ބެލުމަށް މައިމީހާގެ ދަށްބަނޑާއި ހިސާބު ތިރިން "ޅިނދުކަށި"ން ފެށިގެން މައްޗަށް ރަހިމުގެ މަތީ ފާރަށް ނުވަތަ ފަންޑަސް އާއި ދެމެދުގައިވާ ދުރުމިން ނޫނީ ދިގުމިން ބެލެއެވެ. ފަންޑަސް ގެ ދިގުމިން ބަލަނީ ސެންޓިމީޓަރު (ސމ) އިންނެވެ. ބަނޑަށް 20 ހަފްތާ ފުރުމަށްފަހު ފަންޑަސްގެ ދިގުމިނަކީ ހަމަ ބަނޑަށްވީ ދުވަހެވެ. މާނައަކީ ބަނޑަށް 24 ހަފްތާ ކަމުގައިވާނަމަ، ފަންޑަސްގެ ދިގުމިނަކީ 24 ސމ އެވެ. ލަފާކުރާ ވަރަށްވުރެ ފަންޑަސްގެ ދިގުމިން ކުޑަނަމަ، ފަހަރުގައި އެއީ ތުއްތު ދަރިފުޅު ރަނގަޅަށް ހެދިބޮޑުނުވާތީ (ތުއްތު ދަރިފުޅު ކުޑަވުމުން ) ކަމަށްވުމަކީ އެކަށީގެންވާ ކަމެކެވެ.

(ނ) ސްކޭންކުރުން : މާބަނޑު ދުވަސްވަރު މައިމީހާގެ ބަނޑުގެ ސްކޭން ހެދުމަކީ ވެސް ރަހިމުގައި އޮންނަ ތުއްތު ދަރިފުޅުގެ ހެދިބޮޑުވުން ބެލުމަށް ކުރެވޭނެ ކަމެކެވެ. މިއީ ފަންޑަސް ގެ ދިގުމިން ބެލުމަށް މާ ބޭނުންތެރި ރަނގަޅު ގޮތެކެވެ. ސްކޭންގެ ތެރެއިން ބޮލުގެ، ބަނޑުގެ އަދި މާކަޅުވާ ކަށިގަނޑުގެ މިންތައް ބެލެއެވެ. މިމިންތައް ތުއްތު ދަރިފުޅުގެ ބަރުދަން ލަފާކުރުމުގައި ބޭނުން ކުރެވެއެވެ.

ބަހާލެވިފައިވާ ގިންތިތައް

އުފަންވާތާ ދެތިން ގަޑިއިރުގެ ތެރޭގައި ތުއްތު ދަރިފުޅުގެ ބަރުދަން ބެލޭނެއެވެ. ވިހޭއިރު ބަނޑަށްވީ ދުވަހަކާއި ކުއްޖާގެ ބަރުދަން އަޅާ ކިޔާނެ އެވެ. އެގޮތުން އުފަނާވާއިރު ބަރުދަން 2.5 ކިލޯގްރާމަށްވުރެ ލުއިނަމަ، އެއީ އުފަންވާއިރު ބަރުދަން ލުއިކަމަށް ބެލޭނެއެވެ. އުފަންވިއިރު ބަރުދަން 1.5 ކިލޯގްރާމަށްވުރެ ލުއިނަމަ އެއީ އުފަންވިއިރު ވަރަށް ލުއި ކުއްޖެއްގެ ގޮތުގައި ބެލޭނެ އެވެ. އަދި ބަރުދަން 1 ކިލޯގްރާމަށްވުރެ ދަށްނަމަ އެއީ އުފަންވިއިރު އާދަޔާ ޚިލާފަށް ބަރުދަން ލުއިކުއްޖެއް ކަމުގައި ބެލޭނެ އެވެ.

(ހ) އުފަންވިއިރު ވަރަށް ބަރުދަން ލުއިވުން (very low birth weight): މީގެ މާނައަކީ އުފަންވިއިރު ބަރުދަން 1.5 ކިލޯގްރާމަށްވުރެ ދަށުގައި ހުރުމެވެ.

(ށ) އުފަންވިއިރު އާދަޔާ ޚިލާފަށް ބަރުދަން ލުއިވުން (extremely low birth weight): މީގެ މާނައަކީ އުފަންވިއިރު ބަރުދަން 1 ކިލޯގްރާމަށްވުރެ ދަށުގައި ހުރުމެވެ.

ފަރުވާ

އުފަންވާއިރު ބަރުދަން ލުއިކުދިންނަށް ދޭ ފަރުވާ ބަރޯސާވަނީ އުފަންވި ތުއްތު ދަރިފުޅަށް ކުރިމަތިވެފައިވާ އުދަނގޫތަކާއި، އުފަންވިއިރު އުމުރު (ނޫނީ މައިމީހާގެ ބަނޑަށްވީ ދުވަސް/ހަފްތާ) ، ތުއްތު ދަރިފުޅުގެ އާންމު ދުޅަހެޔޮކަން ،  އަދި ކުރިމަތިވެފައިވާ ހާލަތު ގެ ނުރައްކާތެރި ކަން ފަދަ ކަންކަމުގެ މައްޗަށެވެ.

އުފަންވާއިރު ބަރުދަން ލުއި ކުދިންނަށް ދޭ ފަރުވާތަކުގެ ތެރޭގައި އަންނަނިވި ކަންތައްތައް ހިމެނެއެވެ.

·         ތުއްތު ކުދިންނަށް ޚާއްޞަ އިންޓެންސިވް ކެއަރ ޔުނިޓް ގައި ފަރުވާ ދިނުން

·         ހަށިގަނޑުގެ ފިނިހޫނުމިން އެއްވަރެއްގައި ހިފަހައްޓައިދޭ އެނދުގައި ފަރުވާ ދިނުން

·         ވަކި ޚާއްޞަ ގޮތަކަށް ކާންދިނުން : ބައެއް ފަހަރު ތުއްތު ދަރިފުޅަށް ދަމަށް ނޭނގޭނަމަ ކާންދިނުމަށް ބަނޑަށް ހޮޅިއެއް ގުޅަންޖެހިދާނެ އެވެ. ނޫނީ އައިވީ ގުޅައިގެން އެންއައިސީޔޫގައި އޮންނަ މުއްދަތުގައި ގަވާޢިދުން އައިވީ ދޭންޖެހިދާނެއެވެ.

އުފަންވިއިރު ބަރުދަން ލުއިކުއްޖެއްގެ ދުޅަހެޔޮކަން ނޫނީ ލިބިދާނެ ކުރިއެރުން ލަފާކުރުމުގައި އުފަންވިއިރު ހުރި ބަރުދަނަށް ބަރޯސާ ވެއެވެ. އެގޮތުން އުފަންވިއިރު ބަރުދަން 500 ގްރާމަށްވުރެ ދަށްކުދިން ސަލާމަތްވުމަކީ ވަރަށް ނާދިރު ކަމެކެވެ.

ރައްކާތެރިވުން

އުފަންވާއިރު ބަރުދަން ލުއިވުމުން ރައްކާތެރިވެވޭނީ ދުވަސްނުފުރާ އުފަންވުމުން ރައްކާތެރި ކުރެވިގެންނެވެ. އެހެންކަމުން ދުވަސްނުފުރާ އުފަންވުން ނޫނީ ދުވަސްނުފުރާ ވިހެއުމުން ރައްކާތެރިވުމަށްޓަކައި އަންނަނިވި ކަންތައްތަކަށް ސަމާލުކަން ދިނުމަކީ މުހިއްމު ކަމެކެވެ.

ދުވަސްނުފުރާ އުފަންވުމުގެ ހިރާސް ކުޑަކުރުމަށްޓަކައި ނޫނީ ދުވަސްނުފުރާ ވިހެއުމުގެ ހިރާސް ކުޑަކުރުމަށްޓަކައި ދުވަސްނުފުރާ ވިހެއުން ނޫނީ އުފަންވުމަށް މަގުފަހިވާ ކަންތައްތަކާ ވީވަރަކުން ދުރުހެލިވެވިދާނެ އެވެ. އެގޮތުން ދުވަސްނުފުރާ އުފަންވުން ނޫނީ ދުވަސްނުފުރާ ވިހެއުމުން ރައްކާތެރިވުމަށް ކުރެވިދާނެ ބައެއް ކަންތައްތައް ތިރީގައި މިވަނީ އެވެ.

·         ދުންފަތުގެ އިސްތިއުމާލުކުރުމުން ދުރުހެލިވުން

·         ބަނގުރާ ބުއިމުން ދުރުހެލިވުން

·         މަސްތުވާތަކެތި ބޭނުންކުރުމުން ދުރުހެލިވުން

·         މާބަނޑު ދުވަސްވަރު ގަވާއިދުން ޑޮކްޓަރަށް ދެއްކުން

·         ދުވަސްނުފުރާ ވިހެއުމުގެ އަލާމާތެއް ފާހަގަވާނަމަ ލަސްނުކޮށް ޑޮކްޓަރަށް ދެއްކުން

 

ނޯޓް : މިއީ މައުލޫމާތު ފެތުރުމުގެ ނިޔަތުގައި ލިޔެފައިވާ ލިޔުމެކެވެ.

ހަވާލާ

·          https://www.stanfordchildrens.org/en/topic/default?id=low-birthweight-90-P02382

·         https://www.chop.edu/conditions-diseases/low-birthweight