Thursday, May 30, 2013

ނާރު ސެލް

ނިއުރޯން (ނާރު ސެލް)
ނާރު ސެލް(Nerve cell)  ނުވަތަ ނިއުރޯން(Neuron) އަކީ އިންސާނާގެ ނާރުތަކުގެ ނިޒާމްގައި ސިކުނޑިއަށާއި، ސިކުނޑިން ހަށިގަނޑުގެ ބައިތަކަށް އެކިއެކި މެސެޖް އުފުލައިދޭ ނާރު ސެލް ތަކެވެ. މިސެލްތަކަށް ސަޕޯޓް ލިބެނީ "ނިއުރޯގްލިއާ"(Neuroglia) ކިޔާ ވަރަށް ޚާއްޞަ ކަނެޓިކްޓިވް ޓިޝޫގެ ސެލްތަކަކުންނެވެ.


ނިއުރޯން އުފެދިފައިވާ ގޮތް
ކޮންމެ ނިއުރޯން އެއް އެކުލެވިގެންވަނީ "ސެލްގެ ޖިސްމު"(Cell body) އަދި އެއިން ނިކުމެފައިވާ ނިގުލާއި، ނަރުވާ ތަކެއްގެ މައްޗަށެވެ. ކޮންމެ ސެލްގެ ޖިސްމަކުން ނިކުމެފައި އިންނާނީ އެންމެ ނިގުލެކެވެ. މިއަށް ކިޔަނީ "އޭކްސަން"(Axon) އެވެ. އަދި ބައިވަރު ނަރުވާ ތައް ހުރެއެވެ. މިނަރުވާ ތަކަށް ކިޔަނީ "ޑެންޑްރައިޓްސް"(Dendrites) އެވެ. ނާރެއް އުފެދެނީ އެތައް ބައިވަރު ނާރު ސެލް ތަކެއް ގުޅި ލާމެހިގެންނެވެ.

އިންސާނާގެ ހަށިގަނޑުގައި ނާރު ސެލްތައް ބައިވެ އިތުރުވެ ގިނައެއް ނުވާނެއެވެ. އަދި މިސެލްތައް ސަލާމަތުން ހުރުމަށް ކާނާ(ހަކުރު) އަދި އޮކްސިޖަން ބަރާބަރަށް މެދު ނުކެނޑި ލިބެންޖެހެއެވެ. ހަށިގަނޑުގައި ހިމެނޭ އެހެން ސެލްތަކާ ޚިލާފަށް ނާރު ސެލްތަކުން "ކެމިކަލް ހަކަތަ"(ATP) އުފައްދާނީ ހަމައެކަނި "ހަކުރު" ންނެވެ.

ނާރު ސެލްއެއްގެ މަސައްކަތް ފެށެނީ ހަށިގަނޑުގެ ބޭރުން ނުވަތަ ހަށިގަނޑުގެ އެތެރެއިން އެމަސައްކަތެއް ކުރުމަށް ލިބޭ ބާރަކާ އެކުގައެވެ. މިސާލަކަށް ހަށިގަނޑުގައި އަތްލުމުން އެއަތްލިކަމުގެ އިހްސާސް ނާރު ސެލްތައް އިހްސާސް އުފުލައިދޭ ނާރުތައް މެދުވެރިގެން ސިކުނޑިއާއި ހަމައަށް ފޯރުކޮށްދެއެވެ. ލޭގެތެރޭގައި ވިހަ ކާބަންޑައި އޮކްސައިޑްގެ މިންވަރު މަތިވުމުން އެކަން ސިކުނޑިއަށް އެންގުމާއެކު ވިހަތައް އިތުރުވުމުގެ ސަބަބުން ކުރިމަތިވާ ނޭވަޔަށް އުދަގޫވުން ފެށިގެން ދެއެވެ.

ސެލްގެ ޖިސްމު
ކޮންމެ ނާރު ސެލް އެއް ވެސް އޭގެ ސައިޒާއި ބައްޓަމުން ތަފާތުވެދާނެ އެވެ. އަދި މިއީ ހަމަ ލޮލަށް ފެންނަވަރަށްވުރެ ކުދި ސެލްތަކެކެވެ. ނާރުތަކުގެ ނިޒާމުގައި ހިމެނޭ "ގްރޭ މެޓަރ"(grey matter) އޭ ކިޔާ ބައި އުފެދެނީ "ސެލްގެ ޖިސްމު" ތަކުންނެވެ. ބޮޑަށް ހުންނަނީ ސިކުނޑީގެ ވަށައިގެންނާއި، ސްޕައިނަލް ކޯޑްގެ މެދުންނެވެ. ސެންޓްރަލް ނާރވަސް ސިސްޓަމް ގައި ސެލްގެ ޖިސްމުތައް އެކުވެގެން އުފެދޭ ގުރޫޕަށް ކިޔަނީ "ނިއުކްލިއައި"(nuclei) އެވެ. އަދި ޕެރިފެރަލް ނާރވަސް ސިސްޓަމް ގައި ސެލްގެ ޖިސްމުތައް އެކުވެގެން އުފެދޭ ގުރޫޕަށް ކިޔަނީ "ގެންގްލިއާ"(ganglia) އެވެ. މިއާއި ހަމައެކަނި ތަފާތުވާ ނިއުކްލިއައި އަކީ "ސެރަބްރަމް"(cerebrum) ގައިވާ "ބޭސަލް ގެންގްލިއާ"(basal ganglia) އެވެ.

އޭކްސަން އަދި ޑެންޑްރައިޓްސް
އޭކްސަން އަދި ޑެންޑްރައިޓްސް އަކީ ސެލްގެ ޖިސްމުން ކުރިފަޅައި ނިކުމެފައިވާ ނިގުލާއި ނަރުވާ ތަކެވެ. އޭކްސަން އަކީ ސެލްގެ ޖިސްމުން ނިކުމެފައިވާ ނިގުލެކެވެ. އަދި ޑެންޑްރައިޓްސް އަކީ ސެލްގެ ޖިސްމުން ނިކުމެފައިވާ ނަރުވާ ތަކެކެވެ. ނާރުތަކުގެ ނިޒާމްގައި ހިމެނޭ "ވައިޓް މޭޓަރ"(white matter) އޭ ކިޔާ ބައި އުފެދެނީ ސެލް ޖިސްމުން ނިކުމެފައިވާ މިބުނި ނިގުލާއި ނަރުވާ ތަކުންނެވެ.

އޭކްސަން
އޭކްސަން(axon) ތައް ހުންނަނީ ސިކުނޑީގެ އެތެރޭގަޔާއި، ސްޕައިނަލް ކޯޑު ގެ އަރިމަތީގައެވެ. ސިކުނޑީގެ ތެރޭގައި ހުންނަ އޭކްސަން ތައް ހުންނަނީ ގުރޫޕު ގުރޫޕަށެވެ. މިފަދަ ގުރޫޕުތަކަށް ކިޔަނީ "ޓްރެކްޓް"(tracts) އެވެ. އަދި ސްޕައިނަލް ކޯޑުގެ އަރިމަތީގައިވާ އޭކްސަން ތަކަކީ "ނާރު"(Nerves) ތަކެވެ. މާނައަކީ މިއީ ސިކުނޑިއާއި ސްޕައިނަލް ކޯޑުން ކުރިފަޅައި ނިކުމެފައިވާ ނާރު ތަކެވެ.

ކޮންމެ ނާރު ސެލް އެއްގައި އިންނަނީ އެންމެ "އޭކްސަން"(Axon) އެކެވެ. މިއޭކްސަން ނިކުމެފައި އިންނަނީ ސެލްގެ ޖިސްމުގައިވާ "އޭކްސަން ހިލޮކް"(Axon hillock) ކިޔާ ހިސާބަކުންނެވެ. ސިކުނޑިން ފޮނުވާ މެސެޖުތައް ސެލްގެ ޖިސްމުން ދުރަށް ގެންގޮސްދެނީ މި އޭކްސަން އިންނެވެ. އޭކްސަން ޑެންޑްރައިޓް ތަކަށްވުރެ ދިގުވާނެ އެވެ. ބައެއް ފަހަރު އޭކްސަން ގެ ދިގުމިނުގައި 100 ސމ ވަރުހުރެއެވެ. އޭކްސަން ގެ ވަށައިގެންވާ ތުނި ފަށަލަ އަށް ކިޔަނީ "އޭކްސަލެމާ"(Axollema) އެވެ.

ޑެންޓްރައިޓްސް
ޑެންޓްރައިޓްސް(dendrites) އަކީ ސެލްގެ ޖިސްމުން ނިކުމެފައިވާ ނަރުވާ ތަކެއް ފަދަ ބައިތަކެވެ. ޑެންޑްރައިޓްސް އަކީ ތަފާތު މެސެޖުތައް ލިބިގަނެ، ސެލްގެ ޖިސްމަށް އެމެސެޖްތައް ފޮނުވައިދޭ މެދުވެރި އެކެވެ. މިއީ އުފެދުމުގައި އޭކްސަން އާއި އެއްގޮތް، ނަމަވެސް ސައިޒުން ކުޑަ، ކަފިކަތްޕަށް ހުންނަ ބައިތަކެކެވެ.

ހަރަކާތް އުފުލައިދޭ ނިއުރޯން ތަކުގައި "ސައިނެޕްސް"(synapse) ތައް އުފެދުމުގައި ޑެންޑްރައިޓްސް ބައިވެރި ވެއެވެ. އަދި އިހުސާސް އުފުލައިދޭ ނިއުރޯން ތަކުގައި އިހުސާސް އުފުލައިދޭ ރިސެޕްޓަރު ތައް އުފެދުމުގައި ޑެންޑްރައިޓްސް ބައިވެރި ވެއެވެ.

ނޯޓް : އެއް ނިއުރޯން އަނެއް ނިއުރޯން އާ ޖިސްމާނީ ގޮތުން ގުޅި ލާމެހިފައެއް ނުވާނެއެވެ. އެއް ނިއުރޯން އިން އަނެއް ނިއުރޯން އަށް މެސެޖު ނުވަތަ ސިގުނަލް ދައުރުވަނީ ވަކި ޕޮއިންޓެއް ހުރަސްކޮށެވެ. އެގޮތުން އެއް ނިއުރޯން އިން އަނެއް ނިއުރޯން އަށް ސިގުނަލް ގެންގޮސްދޭ ޕޮއިންޓަށް ކިޔަނީ "ސައިނެޕްސް"(synapse) އެވެ.

ނިއުރޯންގެ ވައްތަރުތައް
މައިއެލިން ފަށަލަ ލެވިފައިވާ ނިއުރޯން ތައް (myelinated neurons): ބޮޑެތި "އޭކްސަން" ތަކާ، އަތްފައިގައިވާ ނާރުތަކުގެ ވަށައިގެން "މައިއެލިން ޝީތު"(myelin sheath) ކިޔާ ފަށަލަ އެއް ލެވިފައި ވެއެވެ. މިއީ އޭކްސަން ވަށައިގެން އެއްކޮޅުން އަނެއްކޮޅަށް އެތުރިފައި ހުންނަ "ޝްވާން ސެލް"(Schwann cell) ގެ ސިލްސިލާ އެކެވެ. ކޮންމެ އޭކްސަން އެއްގެ ވަށައިގެން ޝްވާން ސެލް ތަކުން އުފެދިފައިވާ "ޕްލާޒްމާ މެންބްރޭން"ގެ ފަށަލަތައް މަތިމައްޗަށް އެތުރިފައި ހުންނާނެ އެވެ. ޕްލާޒް މެންބްރޭން ފަށަލަތަކުގެ ދެމެދުގައި "މައިއެލިން"(myelin) ކިޔާ ތެޔޮ މާއްދާއެއް ހުންނާނެ އެވެ. ޝްވާން ސެލް ތަކުން އުފެދިފައިވާ "ޕްލާޒްމާ މެންބްރޭން"(plasma membrane) ގެ އެންމެ ބޭރު ފަށަލަ އަށް ކިޔަނީ "ނިޔުރަލެމާ"(neurilemma) އެވެ. އޭކްސަން ގެ ވަށައިގެންވާގޮތަށް އެއްކޮޅުން އަނެއްކޮޅަށް އެތުރިފައި ހުންނަ ޝްވާން ސެލްތަކުގެ ދެމެދުގައި އޭކްސަން ގެ ވަށައިގެން ހުންނަ "އޭކްސަލެމާ"(axollema) ހާމަވާގޮތަށް ފެންނަން ހުންނަ ތަންކޮޅެއް ހުރެއެވެ. މިތަންކޮޅަށް ކިޔަނީ " ނޯޑްސް އޮފް ރަންވިއޭ"(nodes of ranvier) އެވެ.
މައިއެލިން ފަށަލަ ލެވިފައިނުވާ ނިއުރޯން ތައް (non-myelinated neurons): އާންމު ގޮތެއްގައި "ޕޯސްޓް ގޭންގްލީއަނިކް ފައިބަރު"(post ganglionic fibers) ތައް އަދި ސެންޓްރަލް ނާރވަސް ސިސްޓަމް ގައި ހިމެނޭ ކުދި ނާރު ފައިބަރު ތަކުގެ ވަށައިގެން މައިއެލިން ފަށަލަ ލެވިފައެއް ނުހުރެއެވެ. މިވައްތަރުގެ ނިއުރޯންތަކުގައި ޝްވާން ސެލް ތަކުން އުފެދިފައިވާ ޕްލާޒްމާ މެންބްރޭން ގެތެރެއަށް އެތަކެއް އޭކްސަން އެއް ފެތިފައި ހުރެއެވެ. އަދި ކުރިން ބުނި ވައްތަރާ ޚިލާފަށް ހުރިހާ ޝްވާން ސެލްތަކެއް ހުންނަނީ ގުޅިފައެވެ. މިވައްތަރުގެ ނިއުރޯން ތަކުގައި ނާރުގެ މެސެޖުތަކާ ސިގްނަލް ތައް ދަތުރުކުރާ މިންވަރު ލަސްވާނެ އެވެ.

ނޯޓް : "ގޭންގްލީއަން"(ganglion) އަކީ ހަށިގަނޑުގެ އެކި ހިސާބުތަކުގައި އެތުރިފައި ހުންނަ ނާރު ސެލްތަކުގެ ފުނިވަރެކެވެ. އެގޮތުން ސެންޓްރަލް ނާރވަސް ސިސްޓަމް އިން މިބުނި ނާރު ސެލްތަކުގެ ފުނިވަރަށް ގޮސްފައި އިންނަ ނާރު ފައިބަރަކީ "ޕްރީގޭންގްލީއަނިކް ފައިބަރު"(preganglionic fibers) އެވެ. އަދި އެނާރު ސެލް ފުނިވަރުން ފެށިގެން އޭގެ މަސައްކަތް ރައްދުވާ ގުނަވަނަށް ގޮސްފައި އިންނަ ނާރު ފައިބަރަކީ "ޕޯސްޓް ގޭންގްލީއަނިކް ފައިބަރު" (post ganglionic fibers) އެވެ.

ނާރުގެ މަސައްކަތްތައް ހިނގާ ނުހިނގާގޮތް ނުވަތަ ނާރެއްގެ ތެރޭގައި ސިގުނަލް ދައުރުވާގޮތް
ވަކި ނާރެއްގެ މަސައްކަތް ފެށިގެން އަންނަނީ އިހްސާސް އުފުލައިދޭ ނާރެއްގެ ކޮޅު(sensory nerve endings) ހީވާގިވެ މުރާލިވުމުން، ނުވަތަ އެއް ނާރަކުން ފޮނުވަމުން (އުފުލަމުން)ދާ މެސެޖެއް އަނެއް ނާރަކަށް ވާޞިލްވުމުންނެވެ. އެގޮތުން ނާރެއް މަސައްކަތް ހިގަން ފަށަނީ ނާރު ސެލްގެ ފަށަލަ(nerve cell membrane) ހުރަސްކޮށް "އަޔަން"(ions) ތައް އެއްފަޅިން އަނެއް ފަޅިއަށް ދައުރުވުމުންނެވެ. އެއްވެސް ކަމެއްނެތި އަރާމުކުރާ ހާލަތު (resting state)ގައި ނާރުސެލްގެ ފަށަލަ ހުންނާނީ "ޕޮލަރައިޒްޑް"(polarized) ކޮށެވެ. މާނައަކީ ނާރުސެލްގެ ފަށަލައިގެ ކޮންމެ ފަރާތެއްގައިވާނީ ވަކި ނުވަތަ ތަފާތު "އިލެކްޓްރިކަލް ޗާރޖް"(electrical charge) އެކެވެ. މިގޮތަށް ހުރުމަށް ކިޔަނީ "ރެސްޓިންގ މެންބްރޭން ޕޮޓެންޝަލް"(RMP) އެވެ. އަދި މިހާލަތުގައި ނާރުސެލްގެ ފަށަލައިގެ ބޭރުގައި ހުންނާނީ ޕޮޒިޓިވް އިލެކްޓްރިކް ޗާރޖް(positive electric charge) އެވެ. އަދި ނާރު ސެލް ފަށަލައިގެ އެތެރޭގައި ހުންނާނީ ނެގެޓް އިލެކްޓްރިކް ޗާރޖް(negative electric charge) އެވެ. އެގޮތުން ނާރުސެލްގެ ފަށަލައިގެ ދެފަރާތުގައި މައިގަނޑު ގޮތެއްގައި ހިމެނޭ އަޔަން(ions) ތަކަކީ ސޯޑިއަމް އަދި ޕޮޓޭޝިއަމް އެވެ. އާންމު ގޮތެއްގައި ސޯޑިއަމް ހުންނަނީ ސެލްތަކުން ބޭރުގައެވެ. ޕޮޓޭޝިއަމް ހުންނާނީ ސެލްތަކުގެ އެތެރޭގައެވެ.

އެއްވެސް ކަމެއްނެތި އަރާމު ކުރާ ހާލަތުގައި މިއަޔަންތައް ނާރު ސެލްގެ ފަށަލައިގެ ކޮންމެ ފަރާތަކަށް ދިއުމުގެ ފުރުޞަތު ވެސް އޮންނާނެ އެވެ. އެކަމަކު އެއީ ނާރު ސެލް ފަށަލައިގެ އެތެރެ ނުވަތަ ބޭރުގައި އެމާއްދާ (އަޔަން) އެއް ހުންނަ މިންވަރެއްގެ މައްޗަށް ނިސްބަތްކޮށެވެ.

ނާރު ސެލް އެއް ހީވާގިކުރުމުން ނާރު ސެލް ފަށަލަ ހުރަސްކޮށް އެއްފަރާތުން އަނެއް ފަރާތަށް ކުރިން ބުނި އަޔަން ތައް ގެންދިއުމަށް ނާރު ސެލް ފަށަލައަށް ލިބިފައިވާ ގާބިލްކަމަށް ބަދަލު އާދެއެވެ. އެގޮތުން ސެލްތަކުގެ ބޭރުގައި ހުންނަ ދިޔަ(ECF) އިން ސޯޑިއަމް ނިއުރޯންގެ ތެރެއަށް ދަމާލާނެ އެވެ. ހަމައެއާއެކު ނިއުރޯންގެ އެތެރޭގައި ހުރި ޕޮޓޭޝިއަމް ނިއުރޯން އިން ބޭރުކޮށްލާނެ އެވެ. މިގޮތަށް ވުމުން ނާރު ސެލް ފަށަލަ "ޑިޕޮލަރައިޒޭޝަން"(depolarization) ކިޔާ ހާލަތަކަށް ބަދަލު  ވެއެވެ. މާނައަކީ މިހާލަތުގައި ނާރު ސެލް އިން ސިގުނަލްތައް ދައުރުކުރާނެ އެވެ. ޑިޕޮލަރައިޒޭޝަން އަކީ އަކީ ވަރަށް ވަރަށް ކުޑަ ހިނދުކޮޅެކެވެ. އެހިނދުކޮޅުގެ ތެރޭގައި ނިއުރޯންގެ އެއްކޮޅުން އަނެއްކޮޅަށް ސިގުނަލް ދަތުރުކޮށްލާނެ އެވެ. އެގޮތުން ސިގުނަލް ދަތުރުކުރާނީ އެއްކޮޅަކަށެވެ. ޑިޕޮލަރައިޒޭޝަން އަށްފަހު އަނެއްކާ ވެސް ރިޕޮލަރައިޒޭޝަން(repolarization) ނުވަތަ ކުރިން ހުރި ހާލަތަށް ބަދަލުވާނެ އެވެ. މާނައަކީ ސޯޑިއަމް ނިއުރޯން އިން ބޭރަށް އައުމާއެކު، ޕޮޓޭޝިއަމް ނިއުރޯންގެ އެތެރެއަށް ދަމާލާނެ އެވެ. މިގޮތަށް މިމަސައްކަތް ހުއްޓިނެތި ކުރިޔަށްދާނެ އެވެ.

ނޯޓް : މިއީ މައުލޫމާތު ފެތުރުމުގެ ނިޔަތުގައި ލިޔެފައިވާ ލިޔުމެކެވެ.


ނާރު

ނާރު
ކޮންމެ ނާރެއް(nerves) އުފެދިފައިވަނީ އެތަކެއް ނާރު ސެލް(nerve cell or neuron) ތަކެއް ގުޅި ލާމެހިގެންނެވެ. ކޮންމެ ނާރެއްގެ ވަށައިގެން ރައްކަލަކަށް ފަށަލަތަކެއް ލެވިފައި ވެއެވެ. އެގޮތުން ލެވިފައިވާ ފަށަލަ ތަކަކީ "އެންޑޯނިއުރީއަމް"(endoneurium) ، "ޕެރިނިއުރީއަމް" (perineurium)، އަދި "އެޕިނިއުރީއަމް"(epineurium) އެވެ.



ނާރުތަކުގެ ނިޒާމުގައި ހިމެނޭ ޕެރިފެރަލް ނާރވަސް ސިސްޓަމް ބިނާވެފައިވަނީ ސިކުނޑިއާ ސްޕައިނަލް ކޯޑުން ނިކުމެފައިވާ ނާރުތަކުގެ މައްޗަށެވެ. އޭގެ ތެރޭގައި ހިމެނެނީ "ކްރެނިއަލް ނާރު"(Cranial nerves)ތަކާއި"ސްޕައިނަލް ނާރު"(spinal nerves)ތަކެވެ.މީގެތެރެއިން ބައެއް ނާރުތަކަކީ އިހްސާސް އުފުލައިދޭ ނާރު(Sensory nerves) ތަކެވެ.އަނެއްބައި ނާރުތަކަކީ ހަރަކާތް އުފުލައިދޭ ނާރު(Motor nerves) ތަކެކެވެ.

އިހުސާސް އުފުލައިދޭ ނާރުތައް
އިހުސާސް އުފުލައިދޭ ނާރު(sensory or afferent nerves)  ތަކަކީ ހަށިގަނޑުގެ އެކި ހިސާބުތަކުން ސްޕައިނަލް ކޯޑަށް މައުލޫމާތު ތައް ފޯރުކޮށްދޭ ނާރު ތަކެކެވެ. މާނައަކީ މިއީ އަހަރެމެންނަށް ތަފާތު އިހުސާސްތައް ގެނެސްދިނުމުގައި ޒިންމާވާ ނާރުތަކެވެ. އެއަށްފަހު މިމައުލޫމާތުތައް ސިކުނޑިއަށް ފޯރާނީ ސްޕައިނަލް ކޯޑުގައި ތެރޭގައި ހިމެނޭ "ގުޅުވައިދޭ ނިއުރޯން"(connector neurons) ތަކުގެ އެހީގައެވެ.

ހަރަކާތް އުފުލައިދޭ ނާރުތައް
ހަރަކާތް އުފުލައިދޭ ނާރު(motor or efferent nerves) ތަކަކީ ސިކުނޑި، ސްޕައިނަލް ކޯޑު އަދި އުޓޮނޮމިކް ގޭންގްލިއާ ތަކުން ފެށިގެން ހަށިގަނޑުގެ އެކި ހިސާބުތަކަށް ( މަސްތައް، ގްލޭންޑް ތަކަށް) މައުލޫމާތު ފޯރުކޮށްދޭ ނާރުތަކެކެވެ. މާނައަކީ މިއީ އަހަރެމެންގެ ތަފާތު ހަރަކާތްތައް ފުރިހަމަކުރުމުގައި ޒިންމާވާ ނާރުތަކެވެ. މިފަދަ ނާރުތަކުގެ ދެވައްތަރެއް ހުރެއެވެ. އެއީ:-
·         ސޮމެޓިކް ނާރވްސް (somatic nerves): މިއީ ހަށިގަނޑުގައި ބޭރުފުށަށް ފެންނަން ހުންނަ މަސްތައް ކޮންޓްރެކްޓް ކުރުމުގައި ބައިވެރިވާ ނާރުތަކެކެވެ. މާނަ އަކީ އަހަރެމެންގެ ބާރާއެކު ހިނގާ ހަރަކާތްތައް (މިސާލަކަށް ގައިގެ މަސްތަކުގެ ހަރަކާތްތައް) ކޮންޓްރޯލް ކުރުމުގައި ބައިވެރިވަނީ އަހަރެމެންގެ އެއްބާރުލުމާއެކު މަސައްކަތްކުރާ ސޮމެޓިކް ނާރު ތަކެވެ.
·         އުޓޮނޮމިކް ނާރވްސް (autonomic nerves): މިއީ ހިތާ އެތެރެހަށީގެ ގުނަވަންތަކުގެ މަސްތައް ކޮންޓްރެކްޓްވުމާ، އެކި ގްލޭންޑް ތަކުން މާއްދާ ތައް ދޫކުރުމުގައި ބައިވެރިވާ ނާރުތަކެކެވެ. މާނައަކީ އަހަރެމެންގެ ބާރަކާ ނުލައި ހިނގާ ހަރަކާތްތައް (މިސާލަކަށް ހަށިގަނޑުގެ އެތެރޭގެ ބައިތަކުގެ މަސައްކަތްތައް) ކޮންޓްރޯކުރުމުގައި ބައިވެރިވަނީ އޭގެ ޒާތުގައި މަސައްކަތްކުރާ އުޓޮނޮމިކް ނާރު ތަކެވެ.
ކްރެނިއަލް ނާރު ތަކާ ސްޕައިނަލް ނާރުތައް
ޕެރިފެރަލް ނާރވަސް ސިސްޓަމްގައި ހިމެނޭ ސޮމެޓިކް ނާރވަސް ސިސްޓަމް ގައި މައިގަނޑު ގޮތެއްގައި ހިމެނެނީ ސްޕައިނަލް ނާރު ތަކާ އަދި ކްރެނިއަލް ނާރު ތަކެވެ. އެނާރުތައް ހިމެނިފައިވާ ގޮތް ތިރީގައި މިވަނީ އެވެ.

ސްޕައިނަލް ނާރު ތައް (Spinal nerves): 31 ޖޯޑު : މިނާރު ތަކަކީ ސްޕައިނަލް ކޯޑު އިން ކުރިފަޅައިގެން ނިކުމެފައިވާ ނާރުތަކެކެވެ.
o  8 ޖޯޑު : ކަރު ހިމެނޭ ހިސާބުން ނިކުމެފައި
o  12 ޖޯޑު : މޭމަތި ހިމެނޭ ހިސާބުން ނިކުމެފައި
o  5 ޖޯޑު : ބަނޑު ހިމެނޭ ހިސާބުން ނިކުމެފައި
o  5 ޖޯޑު : އުނަގަނޑު ހިމެނޭ ހިސާބުން ނުވަތަ ސެކްރަމް ހިމެނޭ ހިސާބުން ނިކުމެފައި
o  1 ޖޯޑު : އެންމެ ފަހުކޮޅު ކޮކްސިކްސް ހިމެނޭ ހިސާބުން ނިކުމެފައި

ކްރެނިއަލް ނާރު(Cranial nerves) ތައް : 12 ޖޯޑު : މިނާރުތަކަކީ ސިކުނޑިން ކުރިފަޅައިގެން ނިކުމެފައިވާ ނާރުތަކެކެވެ.
1-      އޮލްފެކްޓަރީ ނާރވް (Olfactory nerve): ވަހުގެ އިހްސާސް އުފުލައިދޭ ނާރު
2-      އޮޕްޓިކް ނާރވް (Optic nerve): ފެނުމުގެ އިހްސާސް ގެނެސްދޭ ނާރު
3-      އޮކިޔުލޮމޮޓޯ ނާރވް (Oculomotor nerve): ލޮލުގެ މަސްތަކުގެ ހަރަކާތް ގެނެސްދޭ ނާރު
4-      ޓްރޮކްލިއަރ ނާރވް (Trochlear nerve): ލޮލުގެ މަސްތަކުގެ ހަރަކާތް ގެނެސްދޭ ނާރު
5-      ޓްރައިޖެމިނަލް ނާރވް (Trigeminal nerve): މޫނު މަތީގެ ހަރަކާތްތަކާއި، އިހްސާސްތައް އުފުލައިދޭ ނާރު
6-      އެބުޑިއުސެންޓް ނާރވް (Abducent nerve): ލޮލުގެ ލެޗުރަލް ރެކްޓަސް މަސްކޮޅުގެ ހަރަކާތް ގެނެސްދޭ ނާރު
7-      ފޭޝަލް ނާރވް (Fascial nerve): މޫނުމަތީގެ ހަރަކާތްތައް ގެނެސްދީ، އިހުސާސް އުފުލައިދޭ ނާރު
8-      ވެސްޓިބިއުލޯކޮކްލިއަރ ނާރވް (Vastibulocochlear nerve): އަޑުގެ އިހުސާސް އުފުލައިދޭ ނާރު
9-      ގްލޮސޯފެރިންޖިއަލް ނާރވް (Glossopharyngeal nerve): އަނގަޔާއި ކަރުތެރޭގެ ހަރަކާތްތަކާއި އިހްސާސްތައް އުފުލައިދޭ ނާރު
10-   ވޭގަސް ނާރވް (Vagus nerve): އެތެރެހަށީގެ ގުނަވަންތަކުގެ ހަރަކާތްތަކާއި އިހްސާސް އުފުލައިދޭ ނާރު
11-   އެކްސެސަރީ ނާރވް (Accessory nerve): ކަރުގެ އެތެރެއާއި ބޭރުގެ ބައެއް މަސްތަކުގެ ހަރަކާތް އުފުލައިދޭ ނާރު
12-  ހައިޕޯގްލޯސަލް ނާރވް (Hypoglossal nerve): ދުލުގެ ހަރަކާތް ގެނެސްދޭ ނާރު 


ނޯޓް : މިއީ މައުލޫމާތު ފެތުރުމުގެ ނިޔަތުގައި ލިޔެފައިވާ ލިޔުމެކެވެ. 

ސްޕައިނަލް ކޯޑު

ސްޕައިނަލް ކޯޑު
ނާރު ރޮނދި، ނާރު ވާފަށް، ނުވަތަ ސްޕައިނަލް ކޯޑު(Spinal Cord) އަކީ ސިކުނޑިން މޫލައިގެން ތިރިއަށް ފައިބައި، މައިބަދައިގެ މަތިން ފެށިގެން ތިރިއަށް ކަށިތަކުގެ މެދުން އުފެދިފައިވާ މަގު(Vertebral column)ގެ ތެރޭގައި އިންނަ ނާރު ރޮންޖެކެވެ. ނުވަތަ ނާރު ވާފަށެކެވެ. މާނައަކީ ސްޕައިނަލް ކޯޑް ފެށިފައި އިންނާނީ ސިކުނޑީގެ ތިރީގައިވާ "މިޑަލާ އޮބްލޯންގާޓާ" (medulla oblongata)އިންނެވެ. ނިމިފައިވަނީ ބަނޑުހިމެނޭ ހިސާބުގައިވާ މައިބަދައިގެ ފުރަތަމަ ކަށިކޮޅު ގެ ތިރީ ކައިރިއަށެވެ.


ފިރިހެނެއްގެ ހަށިގަނޑުގައި ސްޕައިނަލް ކޯޑުގެ ދިގުމިނުގައި 45 ސެންޓިމީޓަރު ހުރެއެވެ. އަދި ބޯމިނުގައި ކުޑަވައި އިގިލީގެ ބޮޑުމިން ހުރެއެވެ. އެހެންކަމުން ބޮލުގެ ނާށިގަނޑު ސިކުނޑި ހިމާޔަތްކޮށްދޭ އައްޑަނަ އަކަށް ވާފަދައިން މައިބަދައިގެ ކަށިތަކަކީ ސްޕައިނަލް ކޯޑް ހިމާޔަތްކޮށް ރައްކާތެރިކުރުމަށްޓަކައި ލެވިފައިވާ ގުދުރަތީ އައްޑަނަ އެކެވެ.

ސްޕައިނަލް ކޯޑުގެ ވަޒީފާ
ސްޕައިނަލް ކޯޑްގެ މައި ވަޒީފާ އަކީ ޕެރިފެރަލް ނާރވަސް ސިސްޓަމް ސިކުނޑިއަށް ފޮނުވާ ސިގްނަލްތައް ސިކުނޑިއާއި ހަމައަށް ގެންދިއުމުގައި މެދުވެރިއެއްގެ ދައުރު އަދާކުރުމެވެ. ހަމަ މިގޮތަށް ސިކުނޑިން ހަށިގަނޑުގެ އެކި ހިސާބުތަކަށް ނާރުތައް ހުރަސްކޮށް މެސެޖުތައް ފޮނުވުމުގައި ވެސް މެދުވެރިއެއްގެ ދައުރު ސްޕައިނަލް ކޯޑު އަދާކުރެއެވެ.

ސްޕައިނަލް ކޯޑު އުފެދިފައިވާ ގޮތް
ސްޕައިނަލް ކޯޑުން ހުރަހަށް ފަޅާފައި ބަލާލުމުން އޭގެ އެތެރެ އުފެދިފައިވާ ގޮތް ފެންނާނެ އެވެ. އެގޮތުން އެތެރޭގައި (މެދުގައި) ހުންނަ ބައި އުފެދިފައިވަނީ  "ގްރޭ މެޓަރ"(grey matter) އޭ ކިޔާ އަޅިކުލައިގެ ނާރު ފައިބަރު ތަކުންނެވެ. އަދި ބޭރު (ވަށައިގެންވާ) ބައި އުފެދިފައިވަނީ "ވައިޓް މެޓަރ"(white matter) އޭ ކިޔާ ހުދުކުލައިގެ ނާރު ފައިބަރު ތަކުންނެވެ. ސިކުނޑީގެ އެތެރޭގެ ނާރު ފައިބަރުތައް ވެސް އެތުރިފައި ހުންނަނީ މިބީދައިންނެވެ. ސްޕައިނަލް ކޯޑުގެ ވަށައިގެން ދުލިފަށަލަ(Meninges) ތަކެއް ވެއެވެ. މިދުލިފަށަލަތަކުގެ ތެރޭގައި "ސެރެބްރޯސްޕައިނަލް ފުލުއިޑް"(CSF) ކިޔާ ދިޔާ މާއްދާ އެއް ހުރެއެވެ.

ގްރޭ މެޓަރ (grey matter): ސްޕައިނަލް ކޯޑުގެ އެތެރޭގައި ހުންނަ އަޅިކުލައިގެ ނާރު ފައިބަރުތައް ނުވަތަ "ގްރޭ މެޓަރ" އެތުރިފައި ހުންނަނީ އިގިރޭސީގެ "އެޗް"(H) އަކުރުގެ ބައްޓަމަށެވެ. އެހެންކަމުން އުފެދުމުގައި ކުރިމަތީގައި ދެކޮލަމް، ފަހަތުގައި ދެކޮލަމް އަދި އަރިމަތީގައި ދެކޮލަމް ހުންނާނެ އެވެ. އަދި މެދުން ހުރަސްކޮށް ދެފަރާތް ގުޅުވައިދޭ ބައެއް ވެސް ހުންނާނެ އެވެ. މިބައިގެ މެދުން ލޯވަޅެއް ހެދިފައި އިންނާނެއެވެ. ސިކުނޑީގެ ތެރޭގައި އިންނަ "ފޯރތު ވެންޓްރިކަލް"(fourth ventricle) އިން ބައެއް މިލޯވަޅުގެ ތެރެއަށް އައިސްފައި ވެއެވެ. އަދި މިލޯވަޅު ނުވަތަ ހޮއިގެ ތެރޭގައި ސިކުނޑިއާ ސްޕައިނަލް ކޯޑުގެ ވަށައިގެންވާ ދުލިފަށަލަ ތަކުގެ ތެރޭގައި ހުންނަ ދިޔަ ނުވަތަ "ސެރެބްރޯސްޕައިނަލް ފުލުއިޑް"(CSF) ހުރެއެވެ.

ސްޕައިނަލް ކޯޑުން ނިކުމެފައިވާ "ނާރު ސެލްގެ ޖިސްމު"(Nerve cell bodies) ގައި ހިމެނިދާނެ ބައިތަކަކީ:-
·         އިހުސާސް އުފުލައިދޭ ނިއުރޯންތައް (sensory neurons): މިއީ ހަށިގަނޑުގެ އެކި ހިސާބުތަކުން ސިކުނޑިއަށް އިހްސާސްތައް އުފުލައިދޭ ނިއުރޯން ތަކެވެ.
·         ހަރަކާތް އުފުލައިދޭ ނިއުރޯންތައް (motor neurons): މިއީ ސިކުނޑިން ހަށިގަނޑުގެ ބޭރުފުށުން ފެންނަ ހުންނަ މަސްތަކަށް ހަރަކާތްތައް އުފުލައިދޭ ނިއުރޯން ތަކެވެ.
·         ގުޅުވައިދޭ ނިއުރޯންތައް (connector neurons): މިއީ އިހްސާސް އުފުލައިދޭ ނާރު ތަކާ ހަރަކާތް އުފުލައިދޭ ނާރު ތައް ގުޅުވައިދޭ ނިއުރޯން ތަކެވެ.

ވައިޓް މެޓަރ (white matter): ސްޕައިނަލް ކޯޑުގެ ބޭރު ބައިގައި ނުވަތަ މެދު ބައިގެ ވަށައިގެންވާ ހުދުކުލައިގެ ނާރު ފައިބަރުތައް ނުވަތަ "ވައިޓް މެޓަރ" އެތުރިފައި ހުންނަނީ 3 ކޮލަމަކަށް (ޓްރެކްޓްތައް) ވާގޮތަކަށެވެ. އެހެންކަމުން ކުރިމަތީގައި ދެކޮލަމް، ފަހަތުގައި ދެކޮލަމް އަދި އަރިމަތީގައި ދެކޮލަމް ހުންނާނެ އެވެ. މިޓްރެކްޓް ތައް އެކުލެވިގެންވަނީ ސިކުނޑިއަށް އިހުސާސް އުފުލައިދޭ ނާރު ފައިބަރު ތަކާ، ސިކުނޑިން ތިރިއަށް ހަރަކާތް އުފުލައިދޭ ނާރު ފައިބަރު ތަކާ، އަދި އެދެބައި ގުޅުވައިދޭ ނާރު ފައިބަރު ތަކުގެ މައްޗަށެވެ.

ސްޕައިނަލް ކޯޑުގައި ހިމެނޭ ނާރު ޓްރެކްޓް ތައް
އިހުސާސް އުފުލައިދޭ ނާރު ޓްރެކްޓްތައް (sensory nerve tracts): ސިކުނޑިއާ ދިމާލަށް މެސެޖުތައް ގެނެސްދޭ ނިއުރޯންތަކަކީ އިހްސާސް އުފުލައިދޭ ނިއުރޯން ތަކެވެ. ސްޕައިނަލް ކޯޑު ހުރަސްކޮށް ސިކުނޑިއަށް އިހްސާސް އުފުލައިދެނީ މައިގަނޑު ދެ މަޞްދަރަކުންނެވެ. އެއީ:-
·         ހަން : އިހްސާސް އުފުލައިދޭ ރިސެޕްޓަރު (ނާރުތަކުގެ ކޮޅު) ހުންނަނީ ހަމުގައެވެ. މި ރިސެޕްޓަރު ތަކަށް "ކިޔުޓެނިއަސް ރިސެޕްޓަރ"(cutaneous receptors) މިހެން ވެސް ކިޔައެވެ. ތަދު، ފިނި، ހޫނު، ބީހުން، ޕްރެޝަރު ގެ އިހްސާސާއެކު  ހަމުގައި ހުންނަ މި ރިސެޕްޓަރު ތައް މުރާލިވެ ހީވާގިވާނެ އެވެ.
·         ޓެންޑަން ތައް، ހުޅުތައް، މަސްތައް : މި ޓިޝޫ ތަކުގައި ހުންނަ އިހުސާސް އުފުލައިދޭ ރިސެޕްޓަރު ތަކަކީ ވަރަށް ޚާއްޞަ ރިސެޕްޓަރު ތަކެކެވެ. މިރިސެޕްޓަރު ތަކަށް "ޕްރޮޕްރިއޯސެޕްޓަރ"(proprioceptors) މިހެން ވެސް ކިޔައެވެ. މިރިސެޕްޓަރުތައް ހީވާގިވެ މުރާލިވަނީ ހުޅުތަކާ، މަސްތައް އަދި ޓެންޑަން ފަދަ ޓިޝޫތައް ދެމިވާންވުމުންނެވެ.

ހަރަކާތް އުފުލައިދޭ ނާރު ޓްރެކްޓްތައް (motor nerve tracts): ސިކުނޑިން ހަށިގަނޑުގެ އެކި ދިމާލަށް މެސެޖުތައް ގެންގޮސްދޭ ނިއުރޯންތަކަކީ ހަރަކާތް އުފުލައިދޭ ނިއުރޯން ތަކެވެ. ހަރަކާތް އުފުލައިދޭ ނިއުރޯންތައް ހީވާގިކޮށް މުރާލިކުރުމުން:-
·         ހަށިގަނޑުގެ ބޭރުފުށުން ފެންނަން ހުންނަ މަސްތައް ފިތި ކުރުގެޅޭގޮތްވުން (ކޮންޓްރެކްޓްވުން)
·         ހިތާއި އެތެރެހަށީގެ ގުނަވަންތަކުގައި ހުންނަ މަސްތައް ފިތި ކުރުގެޅޭގޮތްވުން (ކޮންޓްރެކްޓްވުން)

ނޯޓް : މިއީ މައުލޫމާތު ފެތުރުމުގެ ނިޔަތުގައި ލިޔެފައިވާ ލިޔުމެކެވެ.